АНУ-ын Үндэсний сагсан бөмбөгийн шигшээ тоглолтын гурав дахь тоглолт өнөөдөр Голден Стэйт Уорриорс багийн талбайд явагдлаа. Хоёр баг өмнөх хоёр тоглолтонд тус бүр нэг хожил аваад байсан юм.
Өнөөдрийн тоглолтонд талбайн зочин болох Торонто Репторс багаараа маш сайн тоглолт үзүүлж тоглолтын туршид илүүрхсээр 123:109-ийн харьцаатай хожил авчээ. Ингэснээр хоёр багийн цувралыг тэд 2:1-ийн харьцаатай тэргүүлж эхэлж байгаа юм.
Торонто Репторс багаас Кавай Леонард 30 оноо 7 самбар 6 оновчтой дамжуулалт 2 бөмбөг таслалт 2 хаалт хийж багаа тэргүүлсэн бол Кайл Лаури 23 оноо 4 самбар 9 оновчтой дамжуулалт, Дэнни Грийн 18 оноо, Паскал Сиакам 18 оноо 9 самбар 6 оновчтой дамжуулалт , Марк Газол 17 оноо 7 самбар 4 оновчтой дамжуулалт өгсөн байна.
Тэгвэл Голдэн Стэйт Уорриорс багаас Стефэн Көрри мөн гайхалтай тоглолтоо үзүүлж, нийт 47 оноо авсан нь плэйофф болон финалын дээд амжилт болж байгаа юм. Гэвч хамтрагч Кэвин Дурант, Клэй Томпсон, Кэвон Лүүни нар талбайд гараагүй нь талбайдаа хожигдол хүлээх болсон юм. Гэхдээ хоёр багийн дөрөв дэх тоглолтод Клэй Томпсон болон Кэвин Дурант нар талбайдаа буцан ирэх боломжтой болохыг мэдэгдлээ.
Цувралын дөрөв дэх тоглолт Бямба гарагт Голдэн Стэйт Уорриорс багийн талбайд явагдах бөгөөд Уорриорс энэ тоглолтод зайлшгүй хожих даалгавартай талбайдаа гарна.
