Д.Грийний хаалт НБА-г үргэлжлүүлнэ

Америкийн Үндэсний сагсан бөмбөгийн холбооны 2018-2019 оны улирлын аварга шалгаруулах тэмцээний финалын тоглолт тун ширүүн үргэлжилсээр байна. Аваргын цомоо хамгаалан тоглож буй Голден Стэйт Уорриорс цувралын тав дахь тоглолтоо Торонто Репторс багийн талбайд хийлээ. Өмнөх дөрвөн тоглолтын хувьд Торонто Репторс 3:1-ээр цувралыг тэргүүлж байгаа. Иймд хожигдох эрхгүй талбайд гарсан аваргуудын хувьд 106:105-ын харьцаатай хожил авч хожлын харьцааг ойртуулж чадсан байна.
Тэдний хожил авсан энэхүү тоглолтод К.Дюрант бэртлээс эргэн ирж талбайд 12 минутыг өнгөрүүлсэн юм. Энэхүү тоглолтод тэрээр 11 оноо авсан бол С.Көрри 31 оноо, К.Томпсон 26 оноо авч багаа тэргүүлжээ.
Харин талбайн эздээс К.Леонард 26 оноо, К.Лаури 18 оноо, М.Газол 17 оноо авч багтаа тусласан хэдий ч тэд өөрийн талбайдаа ийнхүү хожигдол хүлээсэн юм.
Энэхүү тоглолтын дөрөвдүгээр үед талбайн эзэд зургаан оноогоор тэргүүлж байсан бөгөөд С.Көрри, К.Томпсон нар дараалсан гурван холын зайн шидэлтийг амжилттай болгож багтаа тэргүүллийг авчирсан юм. Үүнээс үүссэн онооны тэргүүллийг тэд хадгалж явсаар нэгэн гайхалтай хаалтаар багтаа хожил авчээ. Ганцхан онооны зөрүүтэй хожигдож байсан Торонто багийн К.Лаври цаг дуусах мөчтэй зэрэгцэн шидэлт гүйцэтгэсэн бөгөөд түүний шидэлтэнд Д.Грийн гайхалтай хаалт хийн багтаа хожлоо авчирсан юм. Хэрэв тэрхүү гоол орсон бол НБА-н энэ улирал энэхүү шидэлтээр дуусчих байлаа.
Хоёр багийн цувралын зургаа дахь тоглолт Голден Стэйт Уорриорс багийн талбайд баасан гарагийн өглөө болох хуваарьтай. Хэрэв тэд талбайдаа хожлын харьцааг тэнцүүлж чадвал Торонто Репторс багийн талбайд цуврал өндөрлөнө.