Энэ жилийн хувьд Жижиг, дунд үйлдвэрийг хөгжүүлэх сангаас 1411 иргэн, аж ахуйн нэгж зээл авах хүсэлтээ ирүүлсэн бөгөөд төслийн эхний шатны шалгаруулалт явагдаж дуусчээ. Эхний шатны шалгаруулалтад 534 иргэн, аж ахуйн нэгжийн төсөл шалгаруулалтын шаардлагыг хангасан бөгөөд хоёрдугаар шат болох төслийн урьдчилсан судалгааны шатанд шилжээд байгаа аж. Хоёдугаар шатанд шалгарсан төслөөс 376 нь аж ахуйн нэгжийнх, 158 нь хувь хүний төсөл байгаа юм.
300.0 сая төгрөгөөс 1.0 тэрбум төгрөг хүртэлх хэмжээний зээл хүссэн 65 иргэн, аж ахуйн нэгжийн 47.4 тэрбум төгрөгийн зээлийн хүсэлт дараагийн шатанд шилжсэн байна.
Харин хөдөө орон нутгаас ирүүлсэн 1330 гаруй төслийн нэгдүгээр шатны сонгон шалгаруулалт одоогоор дуусаагүй байгаа бөгөөд энэхүү үйл ажиллагаа 50 хувьтай үргэлжилж байгаа юм.
ЖДҮХСангийн төсөл сонгон шалгаруулах үйл ажиллагаа нийт дөрвөн үе шаттай ба эцсийн зээл олгох шийдвэрийг төсөл сонгон шалгаруулах хороо шийдвэрлэдэг. Энэхүү хорооны бүрэлдэхүүнд олон нийтийн, төрийн бус байгууллагын төлөөлөл оролцож хурлын үйл ажиллагааг олон нийтийн хэвлэл мэдээллийн хэрэгслээр танилцуулахаар төлөвлөжээ.
Мөн эцсийн шатны шалгаруулалтанд тухайн төсөл ирүүлсэн иргэн, аж ахуйн нэгж өөрийн биеэр ирж хийж хэрэгжүүлэхээр төлөвлөж буй төслийн үйл ажиллагаа, үр дүнг товч байдлаар хорооны гишүүдэд танилцуулах боломжийг олгож байгаагаараа мөн онцлог болж байгаа юм.
Сонгон шалгаруулалтад ирсэн бүхий л төслийг дүрэм, журмын дагуу Монголбанкны зээлийн мэдээллийн сан, ЗГ-н тусгай 5 сан, АТГ, Татварын Ерөнхий газар, Сум хөгжүүлэх сангийн хугацаа хэтэрсэн зээлийн өртэй мэдээлллийг тулган нягтлан шалгах ажлыг зохион байгуулж эхний шатны сонгон шалгаруулалтыг хийжээ.
Үүний дүнд 873 төсөл ирүүлэгчийн бичиг баримтын иж бүрдэл хангагдаагүй, татвар, нийгмийн даатгалд өртэй, Монголбанкны зээлийн мэдээллийн санд муу зээлийн түүхтэй, аль эсвэл хугацаа хэтэрсэн зээлийн үлдэгдэлтэй иргэн, аж ахуйн нэгжүүдийн ирүүлсэн материалыг журмын дагуу төсөл ирүүлэгчид буцаах нөхцөл үүсээд байгаа аж.
