Олонхийн шийдвэрт сөрөг хүчний дүгнэлт нөлөөлөхгүй …

 

Монгол Улсын Ерөнхий сайд Ж.Эрдэнэбатын өргөн барьсан Засгийн газрын
бүтцийг УИХ-ын гишүүдийн олонхийн дэмжлэгээр анхан шатны хэлэлцүүлэгт
оруулахаар дэмжигдлээ. Гэхдээ сөрөг хүчин Засгийн газрын бүтцийг дэмжихгүй
гэдгээ илэрхийлсээр байна. 

Тухайлбал, Монгол Улсын Ерөнхийлөгч \”Чиг үүргийн яамдын тоог нэмэгдүүлэх нь
УИХ-ын гишүүн давхар дээл өмсөх боломжийг бүрдүүлж, ард түмэнд өгсөн
амлалтаасаа буцаж байна …, Үйл ажиллагаа нь жигдэрсэн Аж үйлдвэрийн яамыг
татан буулгах нь буруу … , Төрийн байгууллагын нэршил солих нь тогтворгүй
байдлыг бий болгож, мэргэшсэн төрийн албыг алдагдуулах эрсдэлтэй …” гэсэн
үндсэн гурван асуудлаар Засгийн газрын бүтцийг дэмжихгүй, зөвшилцөх хэрэгтэй
гэсэн байр суурийг илэрхийлсэн.

 

Үүний дараа Ерөнхийлөгчийн Тамгын газрын дарга П.Цагаан уг байр суурьт
давхар тайлбар өгсөн юм. Тэрээр \”Нэгэн цагт давхар дээл өмсөх асуудлыг
идэвхтэйгээр эсэргүүцэж байсан МАН-ынхан өнөөдөр албан тушаалын төлөө ард
түмэнд өгсөн амлалтаа хүртэл умартаж, УИХ-ын гишүүд нь сайд болохоор улайрч
байна” гэх утгатай тайлбар хийсэн юм. АН-ын Засгийн газар давхар дээлтэй байж
болдог, харин МАН-ын Засгийн газар давхар дээл өмсч болдоггүй юм байна гэх буруу
ойлголтыг зарим нэгэнд өгсөн мэдээлэл байв уу гэж харж байгаа.

 

Гэхдээ өмнөх парламентаар баталсан хуулиар Ж.Эрдэнэбатын Засгийн газрын
гишүүдийн олонх нь гаднаас буюу дан дээлтэй байх ёстой л доо. Ер нь чиг үүргийн
яамны сайд нар дээлээ давхарлахыг зөвшөөрсөн. Харин үүний дагуу Ж.Эрдэнэбат
сайд чиг үүргийн яамдын тоог нэмэхээр болж, УИХ-ын гишүүдэд сайд гэх давхар
албан тушаал ноогдуулах гэж байна хэмээн Ерөнхийлөгч буруутгаад байгаа юм.

Тэгвэл УИХ дахь АН-ын бүлэг ч Ерөнхийлөгчийн саналтай адил саналыг
өчигдрийн чуулганд танилцуулав. Тодруулбал, УИХ дахь АН-ын бүлэг Засгийн газрын бүтцийн
тухай хуулийн төслийг хэлэлцэж байгаатай холбогдуулан хуралдаж, дараах дүгнэлт гаргасныг бүлгийн
дарга С.Эрдэнэ танилцууллаа.

\” … 1.Үндсэн чиг үүргийн яамдын тоог нэмэх санал нь
УИХ-ын гишүүн Засгийн газрын гишүүнээр давхар ажиллах боломжийг нэмэгдүүлж
байна. Энэ нь ард түмэнд өгсөн амлалттай нийцэхгүй учраас дэмжих боломжгүй.

2.Үйл ажиллагаа нь
жигдэрч байсан Аж үйлдвэрийн яамыг татан буулгасныг дэмжих боломжгүй. Эдийн
засгийн бие даасан байдлыг хангахад үйлдвэржүүлэлтийн бодлого чухал.

3.Мэргэжлийн Засгийн
газар байгуулна гэсэн боловч дэд сайд нарын орон тоог бий болгож байгаа нь
дэмжих боломжгүй.

4.Залуучуудын асуудал
эрхэлсэн бүтэц бий болгоно гэсэн боловч хүүхдийн асуудалтай залуучуудын
асуудлыг хамруулсан нь бодлогыг сулруулна гэж үзэж байна.

5.Тохируулагч болон
хэрэгжүүлэгч агентлагуудын нэрийг өөрчилж байгаа нь төрийн албаны мэргэшсэн
байдлыг алдагдуулах эрсдэл дагуулж байна”гэсэн дүгнэлтийг гаргаж, Ерөнхий сайдын
өргөн барьсан Засгийн газрын бүтцийг дэмжихгүй гэдгээ илэрхийлсэн юм.

 

Гэвч олонх бол олонх л байдаг. АН ч бас олонх байсан удаа бий. Олонхийн давуу
тал цөөнх юу гэж ч дугарч, эсэргүүцсэн олны хүчээр асуудлыг шийдээд явдагт л
оршино.

Ямартай ч Ерөнхий сайд Ж.Эрдэнэбат
сөрөг хүчний тавьж буй хоригт \”Үйлдвэржилтийн бодлогыг хаягдуулсан
асуудал байхгүй. Яамдад орж байгаа үндсэн чиг үүргийг хараарай. Өмнө нь бид нэг Засгийн газарт сайдаар
ажиллаж байсан. Салбарын яамны бодлогыг мэддэггүй хүн Аж үйлдвэрийн яаманд
байдаг, үүнээс болж, дандаа зөрчил үүсдэг байсан. Энэ зөрчлийг арилгахын тулд
салбарын яам бүр дээр үйлдвэржилт, үйлчилгээ үндсэн эрхлэх асуудлынх нь хүрээнд
зохицуулагдаад явахаар тусгасан. Салбарынхаа бодлоготой уялдаж, хөгжлийн
бодлого хэрэгжинэ. Дэд сайдыг бий
болгож байгаа нь тухайн яамыг эзэнгүйдүүлэхгүйн тулд хийж буй алхам. Сайд эзгүй хойгуур тухайн яам
эзэнгүйдэж, өөр сайдад хариуцуулах
шаардлага тулгардаг. Засгийн газрын хуралдаанд асуудал нь ороход өөр яамны сайд
танилцуулах зэрэг бэрхшээл үүсдэг учраас дэд сайдын орон тоо бий болгох
шаардлагатай гэж үзсэн” гэж товч боловч тодорхой хариулт өгөв. Өөрөөр хэлбэлМАН Засгийн газрын бүтцэд сөрөг хүчний тавьж байгаа шиг өөрчлөлт оруулахыг
хүсэхгүй байгаа нь эндээс харагдлаа.

Тэгэхээр Ж.Эрдэнэбатын Засгийн газар 13 яам, 16 сайдтай, мөн дэд
сайдуудтайгаар үйл ажиллагаагаа явуулах нь гэж ойлгож болох юм. Хэн ямар албан
тушаалд очих нь чухал биш. Аль нам гарсан халаа сэлгээ хийгдэх нь мэдээж.
Тиймээс энэ асуудлаа хурдан шийдвэрлээд, дараагийн буюу улс орны эрх ашигт
нийцэх гол ажлуудаа хийж эхлүүлбэл яасан юм бэ гэх санал байна. Бид наадмын
дараа намар гэж ярьдаг. Намар бол өвлийг угтаж, онд мэндийн орохын тулд ихээр
хөдөлмөрлөх улирал юм. Ж.Эрдэнэбатын Засгийн газар хугацаа алдаж суулгүй, ажлаа
орох зайлшгүй шаардлага тулгараад буйг анхаарууштай.

 

А.Аюуш

Үндэстэн агентлаг