Буянт-Ухаа 2 хороололд 972 айлын орон сууцанд бүртгүүлэх хүсэлтэй иргэдийн бүртгэлийн хугацаа 2019.08.05-ны 00.00 цагт дуусан билээ. Бүртгэлийн ажиллагаа дууссантай холбогдуулан Нийслэлийн орон сууцны корпорациас өнөөдөр мэдээлэл хийлээ.
НОСК-ийн захирал Б.Сүхбаатар “Бүртгэлийн хугацаанд нийт 35,058 иргэн хамрагдаж хүсэлтээ баталгаажуулсан байна. Бүртгүүлсэн иргэдийн 87 хувь нь түрээслээд өмчлөх хэлбэрт хүсэлтээ гаргасан бол 13 хувь нь энгийн түрээслэх хэлбэрт бүртгүүлсэн” гэсэн юм. Бүртгүүлэгчдийг ангилбал,
- Залуу гэр бүл 4,443 иргэн,
- Төрийн албан хаагч 6,542 иргэн,
- Хувийн байгууллагад ажиллагсад болон хувиараа хөдөлмөр эрхлэгч 9,549 иргэн,
- 18 хүртэлх насны 4 ба түүнээс дээш хүүхэдтэй гэр бүл 960 иргэн,
- Өрх толгойлсон эцэг, эх 3,148
- Ахмад настан 7,166
- Хөгжлийн бэрхшээлтэй иргэн болон түүнийг халамжилдаг гэр бүл 3,134 иргэн байна.
Түүнчлэн тэрбээр бүртгэлийг хугацааг сунгахгүй, нэмж бүртгэхгүй хэмээсэн юм.
Түрээсийн орон сууцанд хамрагдах иргэдийн сонгон шалгаруулалтад нийслэлийн Засаг даргын зөвлөлөөс томилсон есөн хүний бүрэлдэхүүнтэй комисс түрээсийн орон сууцанд хамрагдах иргэдийг сонгон шалгаруулах бөгөөд комиссын эхний хурлыг маргааш хийхээр төлөвлөжээ.
Шалгаруулалтын эхний шатанд тэнцсэн иргэд гурав хоногийн хугацаанд холбогдох бичиг баримтаа бүрдүүлж өгөх бөгөөд Комиссын сонгон шалгаруулалтын явцад төрийн бус байгууллагуудын төлөөлөл хяналт тавьж ажиллах юм байна.
