НОСК-д “Буянт-Ухаа 2” хорооллын 972 айлын түрээсийн орон сууцанд хамрагдах хүсэлтэй 35 мянга гаруй зорилтот бүлгийн иргэн бүртгүүлжээ. Тэгвэл тэднээс 582 өрх тэнцэж нягтлан шалгах ажиллагааны дараагийн шатанд шилжсэн байна.
Харин үлдсэн 390 айлын орон сууцыг түрээсийн орон сууцанд газар чөлөөлөлт, дахин төлөвлөлтөд хамрагдсан иргэдийг хамруулахаар төлөвлөөд байгаа билээ.
НОСК ХК-ийн Гүйцэтгэх захирал Б.Сүхбаатар:
“Түрээсийн орон сууцны нэг онцлог нь Монгол Улсад анх удаа хэрэгжиж байгаа түрээслээд тодорхой хугацааны дараа өмчлөх хэлбэр юм. Түрээслээд өмчлөх орон сууц гэсэн ангилалд хоёр төрөл багтаж байна.
Үүнд, түрээслэгч нь түрээсийн төлбөрөөс гадна түрээсэлж байгаа орон сууцны үнийг таван жил хүртэлх хугацаанд хэсэгчлэн төлж, түрээсийн орон сууцаа худалдан өмчлөх, эсвэл түрээсэлж байгаа орон сууцны урьдчилгаа төлбөрийг таван жил хүртэлх хугацаанд хэсэгчлэн төлж, түрээсийн орон сууцаа ипотекийн зээлд хамруулан өмчлөх” гэсэн хоёр хэлбэрээр орон сууцаа өөрийн өмчлөлд шилжүүлэн авах боломжтой. Түрээслээд өмчлөх орон сууцны үнийн хувьд нэг ам метр нь нэг сая 450 мянган төгрөг байна. Харин түрээсийн үнэ нь нэг ам метр нь 6000 төгрөг юм байна.
Мөн түрээсийн орон сууцны зориулалтаар газар чөлөөлөх нь эргэлтийн хөрөнгөтэй болж, үргэлжлүүлэн орон сууц барих боломж бий болгож байна. Тухайлбал, 40 хувийн газар чөлөөлөлт хийснээр 9000 айлын түрээсийн орон сууц дахин барих боломжтой болсон” хэмээн мэдээллээ.
