Өнөөдөр гэр хорооллын иргэдийг цахилгаан халаагуур, байшин, сууцны дулаалга болон эко ариун цэврийн өрөөгөө шийдэхэд нь зориулж “Ногоон зээл”-ийн гэрээг БОАЖЯ, Орчны бохирдлыг бууруулах үндэсний хороо болон арилжааны гурван банк хамтран ажиллах гэрээ байгууллаа.
Энэхүү зээлийг Хаан, Хас, Төрийн банкуудаар дамжуулан олгох бөгөөд Орчны бохирдлыг бууруулах үндэсний хорооноос иргэдийн “ногоон” худалдан авалтыг дэмжих зорилгоор зээлийн хүүгийн 9 хувьд татаас өгөхөөр болсон байна. Ингэснээр сарын 0.7 хувийн хүүтэй, 40 хүртэлх сая төгрөгийн зээл авах боломж иргэдэд бүрдэж байгаа юм.
Гэхдээ энэхүү зээл нь эхний ээлжинд тусгайлан сонгосон бүс буюу Гандангийн дэнж орчмын 2,000 орчим өрх айлд хэрэгжинэ.
Түүнчлэн “Ногоон зээл”-ийн бодлогын хэрэгжилтийн агуулгыг хангах зорилгоор зээлээр олгох бүтээгдэхүүнд тавигдах шаардлагыг БОАЖЯ, ОББҮХ-ноос боловсруулан банкуудад хүргүүлсэн бөгөөд уг шаардлагын хүрээнд багтсан бүтээгдэхүүн нь хүний эрүүл мэндэд сөрөг нөлөөгүй, цахилгааны зарцуулалт бага, сүүлийн үеийн дэвшилтэт технологийн бүтээгдэхүүн байх аж.
БОАЖ-ын сайд Н.Цэрэнбат “Өнөөдөр “Ногоон зээл”-ийн хөтөлбөрийг хэрэгжүүлэх ажил эхэллээ. Улаанбаатар хотын иргэдэд бага хүүтэйгээр цахилгаан халаагуур авч, гэр, байшингаа дулаалах боломж нээгдэж байна. “Ногоон зээл”-ийн санхүүжилтийн хэмжээ бага учраас тусгайлсан бүсийг сонгон авч үр дүнг нь харахаар болсон. Эхний ээлжинд Гандангийн дэнжид амьдарч байгаа өрхүүдэд хөнгөлөлттэй зээлийг олгоно. Тус бүсийг утаагүй бүс болгохын төлөө хөнгөлөлтэй зээлээр гэр, байшингаа дулаалаарай, цахилгаан халаагуур аваарай гэж иргэддээ уриалмаар байна.
Банкууд өөр өөрийн шалгуураар зээлээ олгоод явах байх. Үүнээс гадна зээлээр олгох бүтээгдэхүүнүүдийг нийлүүлэгчдээс чанар, аюулгүй байдлын урт хугацааны баталгаа шаардана.
Энэхүү туршилт маань амжилттай явагдвал цаашдаа нийслэлийн бусад бүсэд орших гэр хорооллын 200 мянган өрхөө “Ногоон зээл” авах боломжоор хангахын төлөө ажиллана” хэмээн мэдэгдлээ.
