Өнөөдөр УИХ дахь Ардчилсан намын зөвлөл ээлжит бус хуралдаанаа хийлээ. Энэхүү хуралдаанаар Үндсэн хуульд нэмэлт, өөрчлөлт оруулах төсөлд хүргүүлэх саналаа хэлэлцсэн байна. Зөвлөлөөс гаргасан шийдвэрийг зөвлөлийн дарга Д.Эрдэнэбат, АН-ын дарга С.Эрдэнэ болон зөвлөлийн зарим гишүүд танилцууллаа.
УИХ-ын гишүүн, АН-ын зөвлөлийн дарга Д.Эрдэнэбат “АН-ын зөвлөлийн зүгээс гишүүдийн тоог 99 болгохыг дэмжихгүй. Харин Ерөнхийлөгчийн боловсруулсан төсөлд гишүүдийн тоог 108 болгох үндэслэл, шаардлагыг тодорхой тусгасан байгаа учраас тухайн хувилбарыг дэмжих боломжтой гэж үзэж байна. Гишүүдийн 50 хувь нь жагсаалтаар, 50 хувь нь тойргоос сонгогдох нь зөв гэдгийг бид дэмжиж байгаа. Энэ нь илүү хариуцлагатай байх боломжтой гэж харж байна
Мөн манай зөвлөлийн зүгээс сонгуулийн тогтолцоо, татвар, улс, орон нутгийн эдийн засагтай холбоотой асуудлыг хүлээж авахгүй боломжгүй гэсэн тайлбарыг бид хүлээж авах боломжгүй” гэсэн юм.
УИХ-ын гишүүн, АН-ын дарга С.Эрдэнэ “Үндсэн хуулийн өөрчлөлтийг хэлэлцэх хэлэлцүүлэгт Ардчилсан нам оролцохгүй гэсэн байр суурьтай байсан ч Ерөнхийлөгчийн зүгээс санал ирүүлснийг судалж, дэмжиж хэлэлцүүлэгт орох шийдвэр гаргасан. Бид тодорхой дөрвөн санал тавьсан, тэдгээр байр суурь дээрээ хатуу зогсоно.
Төлөөллийн тогтолцоог шударга болгох хэрэгтэй. 76 гишүүн 76 жалга, дов руу төсвийг хувааж тараагаад байна. Улсын нэгдсэн бодлого алга. Тогтолцоог органик хуулиар зохицуулна гээд байгаа. Дараа нь органик хуульд 99 мажоритар тогтолцоо гээд ороод ирвэл дахиад л 99 жалга дов болчихно. 1992 онд хүн амын тоо хоёр сая гаруй байхад 76 гэдэг тоо гаргасан. Өнөөдөр хүн амын тоо гурван сая давсан байна.
Харин Ерөнхийлөгчийн оруулсан саналд бол 54+54 буюу 54 нь орон нутгаас гэж тодорхой үндэслэл байгаа юм. Өөрөөр хэлбэл, тоондоо биш үндэслэлдээ асуудал нь байгаа” хэмээн мэдэгдлээ.
Д.Эрдэнэбат: УИХ-ын гишүүдийн тоог 99 бус 108 болгохыг дэмжинэ
}
Шинэ мэдээ
