Б.Булган суллагдсан гэв үү

Нийслэлийн Ардчилсан намын дарга Э.Бат-Үүл өчигдөр яаран мэдээлэл хийсэн нь
улс төрийн биш хувийн шинж чанартай байв. Тодруулбал, 18 жилийн өмнөх С.Зориг
агсны хэрэгт түүнийг яллагдагчаар татсан тухай мэдээлэл хийлээ.

 

2000 онд Э.Бат-Үүл уг хэрэгт шалгагдаж улмаар \”ганц худагт”-д хоригдож
байсан удаатай. Гэвч хэргийг мөрдөн шалгах явцад нотлох баримт олдоогүй, хэрэгт
хамааралгүй гэх шалтгаанаар хэрэгсэхгүй болгож байсан юм. Гэхдээ л Э.Бат-Үүлээс
С.Зориг агсны үхэл салсангүй. Ер нь л түүний үхэлтэй холбоотой хэргийг илрүүлэх
бус улс төрийн шалтгаанаар ашиглаад байх хүсэл хэн нэгэнд байгаа нь өнгөрсөн
жилүүдэд болсон үйл явдлууд гэрчлэх мэт.

 

Яг үнэндээ \”С.Зоригийн хэн алсаныг тогтоочихсон” гэх шийдмэг үгс хуулийнхны
амнаас сонсогдсон удаатай. Гэхдээ л хэнд нэгэнд ноогдуулж, зууралдуулах нь
өөрөө улс төрийн шалтгаан аж.

 

Одоо орон нутгийн сонгууль дөхөж байна. Энэ үед аль нэг нам нь \”КО” буюу
хүнд цохилт авах шаардлагатай. Ер нь л сүүлийн үеийн сонгуулиудыг харахад
иймэрхүү сценариар явагддаг болж. Сурталчилгаа эхлэхийн өмнө \”маш муу хүн”-ийг
гаргаж ирнэ. Түүнийгээ сурталчилгааны явцад \”битүү нүднэ”. Ингээд сонгууль
дууссаны дараа хэрэгт холбогдолгүй болгож, цагаатгах, хэргийг хэрэгсэхгүй
болгох мэтээр цэг тавьчихаж байгаа юм.

 

Үнэндээ гэм буруутай байсан уу, үгүй юу огтхон ч хамаагүй гол нь л улс
төрчид тэнд тоглолт хийж, сонгогчид тархиа угаалгана. Энэ тактикийг Засаг барьж
үзсэн барьж байгаа намууд л сайн хийдэг жишигтэй. Мэдээж тэдний гарт хууль
хяналтын байгууллага байгаа учраас дур зоргоороо ашиглаж, өнөөдөр муу хүн гэж
зарлаад маргааш нь мөрдөн байцаалтын явцад хэрэгт холбогдолгүй болох нь
тогтоогдлоо гээд л зарлачихна. Маш хялбар.

 

Э.Бат-Үүл \”Намайг С.Зоригийг зэрлэгээр хөнөөсөн хэрэгт яллагдагчаар татлаа.
Сонгууль бүрийн өмнө ийм мэдээлэл гардаг. Ингэж гүжирдсээр л ирсэн. С.Зоригийг
алж байхад намайг хажууд нь хараад сууж байсан мэтээр гүжирдсээр л байна” гэсэн
тайлбарыг өглөө.

Мэдэхгүй юм. Э.Бат-Үүл тэнд байсан уу үгүй юу. Ёстой л хуулийнхан л мэдэж
байгаа байх. Тэгвэл энэ хугацаанд ёстой л дэргэд нь байсан гэгдэх цорын ганц
гэрч Б.Булган цоожтой хаалганы цаана цагдан хоригдсоор байв. Түүнийг эхлээд хар
тамхины хэргээр шалгаж байгаа гэх мэдээлэл цацагдаж байлаа. Гэвч хуулийнхан
үнэнийг удаан нууж чадсангүй. 18 жилийн өмнөх сэтгэл сэрдхийлгэм аллагын
хэргийг шалгаж байгаа нь тогтоогдсон. Гэхдээ л \”маш нууц” гэх дардастай учраас
хэвлэлийнхэн мэдээлэл тун хомс байлаа.

Ямар ч тайлбар, мэдүүлэггүй, яллагдагчаар татсан гэх баримтгүйгээр бүсгүй
хүнийг жил орчмын хугацаанд хорьж, шалгана гэдэг хэргийн гогцоо олдсоноос
зайлахгүй гэж таамаглана. Магадгүй ингэж шалгах явцад Э.Бат-Үүлтэй холбоотой
баримт мэдээлэл гарч ирсэн ч байж болох л юм. Гэхдээ бас л таамаглал.
Өчигдөрхөн бүтэн жил харанхуй байсан Б.Булганы өрөөний гэрэл асаалттай байхыг
олж үзлээ гэх мэдээллийг уншлаа. Тэгэхээр Б.Булган Э.Бат-Үүлийг \”матчихаад”
гарч ирэв үү гэх хардлага бас төрүүлж байна.

Э.Бат-Үүлээс энэ олон жилийн дараа хурууны хээ, үс, цусны шинжилгээ авсан
гэв. Арай л удаан мөрдөн шалгачихсан уу, үгүй юу. 17, 18 жилийн дараа л \”тэр
байж магадгүй” гээд шинжилгээ авна гэж баймааргүй л юм. Мөн энэ хугацаанд
хурууны хээ, цусны толбо болох нотлох баримтууд хадгалагдсаар байгаа нь
гайхалтай.

 

Улс төрийн аливаа зорилго доо ашиглахаар хадгалж байсныг ч үгүйсгэхгүй.
Гэвч сонгууль бүрийн өмнө С.Зоригийн ясыг өндөлзүүлж, олон нийтийн санаа
бодлоор тоглолт хийж байдгаа одоо больмоор юм аа. Одоо түүнийг тайван нойрсуул
л даа. Гэрч нь байгаад ч илэрч чадалгүй 18 жил болчихсон хэргийг ашиглаж, улс
төр хийдэг хүмүүсээс яаж ч улс орноо гэх сэтгэл зүтгэл гарах билээ дээ. АН-д ч,
МАН-д ч хамааралтай.

 

Ямартай ч бүтэн жил харанхуй байсан өрөө өнөөдрөөс гэрлээ асааж эхэллээ. 18
жил хүлээсэн хэрэг одоо илрэх нь үү гэх горьдлого, багахан найдлага ч бас
бидэнд төрж байна. Улс төр л биш байгаасай.

 

А.Аюуш