ЗГХЭГ-ын дарга Л.Оюун-Эрдэнийг тагнаж, чагнасан гэсэн мэдээлэл гарсан. Тэрээр өөрийгөө тагнуулж, чагнуулж байгаагаа жил гаруйн өмнөөс мэдсэн хэмээн хэвлэлд ярилцлага өгөхдөө хэлж байсан. Тэрээр УИХ-ын Тусгай хяналтын дэд хороонд өргөдөл гаргасан бөгөөд ТЕГ-ын дарга асан Д.Гэрэлийг Л.Оюун-Эрдэнэ сайдын гомдлын дагуу хэрэг үүсгэн шалгаж байгаа билээ.
Тэрээр энэ асуудлаар “Тагнуулж чагнуулсан асуудлаараа тэрээр УИХ-ын Тусгай хяналтын дэд хороонд өргөдөл өгсөн. Тусгай хяналтын дэд хороо прокурор руу шилжүүлсэн. Холбогдох байгууллагууд дээр шалгалт хийгдээд явж байгаа гэсэн мэдээлэл авсан. Эрдэнэтийн 49 хувийн процесс явж байх үед удаа дараа шаардлага тавьж байсан. Би тэр шаардлагыг хүлээж авах боломжгүй. Намайг уулзалт хийж байхад дагасан, тоног төхөөрөмж суурилуулах, орсон газрын бичлэгийг авах гэж санаархсан. Мөн миний эргэн тойронд ажилладаг хүмүүс, туслахын утсанд чагнах төхөөрөмж суурилуулсан байж болох нөхцөл тогтоогдсон гэж ойлгосон.
Одоо бид утас чагнаж байгаа гэж бодоод утсаар ярьж чадахаа байсан. Намайг тагнаж, чагнасан хангалттай нотлох баримт байгаа. Тиймээс тогтоогдох ёстой гэж үзэж байгаа. Хэрээ энэ хэрэг замхарвал хууль хяналтын байгууллагын шалгаж байгаа хүмүүс хамжигч гэж үзнэ. 10-аад материал тогтоогдсон байгаа. Эхний байдлаар тогтоогдсон гэж үзсэн учраас ТЕГ-ын удирдлагуудыг албан тушаалаас нь чөлөөлсөн гэж үзэж болно. Намайг тагнаж, чагнахад оролцсон байж болзошгүй Тагнуулын байгууллагын 11 хүний нэрийг би өгсөн. Хэрвээ намайг тагнасан нь тогтоогдвол ТЕГ Засгийн газрын эсрэг ажилласан болно. Энэ бол Оюун-Эрдэнэ гэдэг хувь хүний асуудал биш” гэж тайлбарлажээ.
