Цаг уур, орчны хүрээлэнгээс өнөөдөр баруун аймгуудын нутгийн хойд, төвийн аймгуудын нутгийн зарим газар, зүүн аймгуудын ихэнх нутгаар бороо, нойтон цас, 2-нд баруун аймгуудын нутгийн зүүн хэсэг, төв болон зүүн аймгуудын ихэнх нутгаар, 3-нд нутгийн зүүн хагаст, 4-нд зүүн аймгуудын нутгийн зүүн хэсгээр хур тунадас орно. Салхи 1, 2-нд говь, тал, хээрийн нутгаар, 3-нд нутгийн өмнөд хэсгээр түр зуур секундэд 16-18 метр хүрч ширүүсэж, шороон болон цасан шуурга шуурах төлөвтэй байгааг мэдээлсэн.
Тэр ч утгаараа хөдөө орон нутаг хот хооронд зорчих замд их хэмжээний цас орж, жолооч нар цасан шуурганд суух тохиолдол гарсаар байна. Тухайлбал, өчигдөр Өвөрхангай аймгийн Хархорин сумаас хот руу гарах хөдөлгөөнийг хязгаарлаж, өнөөдөр нээсэн. Мөн өчигдөр Монголын Пажеро клубын гар нийлсэн 34 залуу 17 автомашинтай 52-ийн давааны хоёр талд цасан шуурганд боогдсон 50 гаруй суудлын жижиг тэрэг, 45 хүний суудалтай есөн автобус, том оврын ачааны 18 машиныг тус тус цасан хунгараас нь гаргажээ.
Харин өнөөдөр мөн л Архангай, Өвөрхангай чиглэлийн зам боогдож, тээврийн хэрэгслүүд сууж байгааг эх сурвалж мэдээлж байна. Тиймээс орон нутгийн замд зорчсон иргэд цасанд суух эрсдэлтэй байгаа тул иргэд, жолооч нар орон нутгийн замд зорчихгүй байхын анхааруулж байна.
