Дархлаажуулалт хожуу эхэлсэн тул орон нутагт наадмын үеэр халдвар эрчимтэй тархах эрсдэлтэй тул хөл хорио тогтоох санал гаргасан гэж УОК-ын дэргэдэх Эрдэмтдийн зөвлөлийн гишүүн, МУИС-ийн Физикийн тэнхимийн эрхлэгч, дэд профессор Д.Улам-Оргих хэллээ. Түүнээс дараах тодруулгыг авлаа.
-Та долоо хоногийн өмнө хөл хорио тогтоох шаардлагагүй гэж хэлсэн. Нөхцөл байдал хэрхэн өөрчлөгдөв өө. Үүнийг тайлбарлаж өгөөч.
-Тооцоолсон ёсоор вакцины нөлөөгөөр халдварын тооны өсөлт зогсон, зургадугаар сарын 18-наас бага зэрэг бууралт ажиглагдаж байна. Гэхдээ хүнд байдал тодорхой хугацаанд үргэлжилнэ гэдгийг бид хэлээд байгаа шүү дээ. Ойролцоогоор тав дахь хоног дээрээ халдвар илэрч, 10 дахь хоногт хүндэрч байгаа нь ажиглагдаж байна. Эсвэл энэ үед буюу 10-11 дэх хоногт эдгэрч байна.
Хөл хорио тогтоох нь халдварыг бууруулна гэж хэлэхгүй ч хүндэрч амь насаа алдах тохиолдлыг багасгана.
Өнөөдөр эрүүл явж буй хүн 14 хоногийн дараа нас барсан байх ч эрсдэл байгааг л анхааруулаад байгаа юм. Ойрын өдрүүдэд илэрч байгаа тохиолдлууд сонгууль болон шагнал урамшууллын үйл ажиллагааны үеэр авсан халдвар. Олон мянган хүнд шагнал авч, найр наадам зохион байгуулсан. Мөн нийслэлийнхний орон нутаг руу амралт зугаалгаар явдаг хөл хөдөлгөөнтэй халдварын хүнд үе давхцаад байгаад л учир бий юм. Хөл хорио тогтоох нь халдварыг бууруулна гэж хэлэхгүй ч хүндэрч амь насаа алдах тохиолдлыг багасгана. Нэг хүний амь ч үнэ цэнтэй шүү дээ.
Нөгөөтээгүүр дархлаажуулалт оройтож эхэлсэн тул хөдөө орон нутагт наадмын өдрүүдэд нөхцөл байдал хүндрэх эрсдэлтэй байгаа юм. Тиймээс бид хөл хорио тогтоох зөвлөмж хүргүүлсэн. Гэхдээ эдийн засаг, бусад зүйлсэд хэрхэн нөлөөлөхийг тооцоолж, Засгийн газраас шийдвэр гаргах байх.
-Хөл хорио тогтоохгүй байх боломж бидэнд бий юу?
-Бий. Үүнд иргэд болон аж ахуй нэгж байгууллагууд ихээхэн үүрэгтэй. Хүний хөдөлгөөнийг багасгаж, ажилчдаа цөөлөх, амраах, эсвэл дийлэнхийг гэрээс нь ажиллуулах зэргийг хэрэгжүүлж болох юм. Мөн зайгаа барин, амны хаалтаа зүүж иргэд агаар салхинд гарч болох ч үүнийг хэтрүүлээд байна шүү дээ. Наадам цэнгээн зохион байгуулж байна. Жишээ авахад дархлаажуулалтад хамгийн бага хамрагдаж байгаа залуучууд гадуур бужигнуулаад байна. Иргэд өөрсдөөс шалтгаалах зүйлсээ горимын дагуу биелүүлбэл халдвар хурдан буурахад нөлөөлнө. Тиймээс хөл хорио тогтоохгүй байлгахад таны оролцоо одоо ч чухал хэвээр байна гэдгийг иргэд ухамсарлах учиртай.
