Хэдхэн долоо хоногийн дараа Хөшигийн хөндийн олон улсын шинэ нисэх онгоцны буудал нээлтээ хийж, ажиллаж эхэлнэ. Шинэ нисэхийг дагаж 32.2 км-ын хурдны замд ан цав үүсээд байгаа билээ. Тус замын засварын ажил энэ сарын эхээр эхэлсэн бөгөөд замын засварын ажил өнөөдрийн байдлаар хэдэн хувьд явж байгаа талаар Зам тээврийн, хөгжлийн яамны Замын ашиглалт засварын хэлтсийн дарга Ч.Сугармаагаас тодрууллаа.
-Замын засварын ажил хэдэн хувьтай явж байгаа вэ?
-Хурдны зам дээр үүссэн ан цавыг засварлах засварын ажил зургадугаар сард эхэлсэн. Шинэ нисэх онгоцны буудлын нээлт долдугаар сарын 4-ний өдөр болох учир ямар ч байсан засварын ажлыг тэрнээс өмнө хийж дуусгана. Одоогийн байдлаар засварын ажил 60 гаруй хувьтай явж байна. Бороо их орж байгаа учраас замын засварын ажил саатаж байгаа ч долдугаар сарын 4-нээс өмнө засварыг бүрэн дуусгахаар шахаж ажиллаж байгаа.
-Хурдны зам дээр өнгөрсөн жилээс эхлэн хагарал үүсч эхэлсэн гэж мэдээлсэн. Тухайн үед засвар хийсэн ч дахин томорч хагарсан. Тиймээс замыг дахин хагаруулахгүй байх тал дээр хэрхэн анхаарч, ямар төрлийн засварыг хийлгэж байгаа вэ?
-Хурдны замын баталгаат засварын хугацаа дуусаагүй учраас замын засварын ажлыг ерөнхий гүйцэтгэгч компани хариуцан хийж байгаа. Ямар ч байсан Зам тээврийн, хөгжлийн яамд ямар ч эвдрэлгүй хүлээлгэж өгөх үүрэгтэй. Тийм учраас ерөнхий гүйцэтгэгч өөрөө технологи аргачлалаа гаргаад, хагарал юунаас болсон шалтгааныг тогтоон ажиллаж байна. Одоогийн байдлаар цууралт үүссэн хэсгийн замыг далан хүртэл задлаад цэвэрлэгээ хийсэн. Тухайн задалсан хэсэгт өрөм тавьж өрөмдөж, цементийн шингэн уусмалыг тусгай машинаар өндөр даралтаар шахаж байгаа. Нийт гурван өрөм ажиллаж байна. Өрөмдсөн хэсгээ дүүргэсний дараа задалсан хэсгээ дахин дүүргэнэ.
-Цууралтын шалтгаан юунаас үүдэлтэй гэж тогтоосон вэ?
-Ерөнхий гүйцэтгэгч компани цууралтын шалтгааныг өөрсдийн хэмжээнд тогтоосон байгаа. Манайхаас хөндлөнгийн хяналт хийхээр өөр компани оруулж георадар багаж тавиулсан. Хөндлөнгийн шалгалтаар “замын доор цэвдэг байхгүй, гүний ус 24 метрээс доош байна. Газар хөдлөлтийн чичирхийлэл тус бүсэд явагдаагүй” гэсэн урьдчилсан дүгнэлт гарсан. Тэгэхээр байгалийн хүчин зүйлээс шалтгаалаагүй учир технологийн алдаа гарсан гэсэн дүгнэлтэд хүрсэн. Ерөнхий гүйцэтгэгч компани технологийн алдаа гарсан гэдгээ хүлээн зөвшөөрсөн.
-Засвар хийсний дараа зам дахин хагарахгүй байх баталгааг хэрхэн гаргаж байгаа вэ?
-Хурдны замын баталгаат засварын хугацаа 2022 онд дуусна. Гэхдээ бидний зүгээс ерөнхий гүйцэтгэгч компанитай хагарсан хэсгийн засвар дууссан өдрөөс эхлэн баталгаат засварын хугацааг дахин тооцож эхэлнэ гэж ярьж байгаа.
