Хүмүүс малын махны оронд хоол хүнсэндээ сардини төрлийн тэжээлийн загас хэрэглэдэг болбол дэлхий даяар жил бүр 750,000 орчим хүний амь аврагдах тооцоог Япон, Австралийн судлаачид гаргажээ.
Үүнээс гадна уур амьсгалын хямралтай тэмцэх үйлсэд томоохон дэмжлэг болох гэнэ.
Тэжээлийн загас (forage fish) гэдэг нь далайн хөхтөн амьтад, махчин загаснууд, шувуудын хоол болох байгалийн зориулалттай мах нь шим тэжээлээр баялаг жижиг загаснуудыг хэлдэг.
Судлаачид малын махны хэрэглээ хүмүүсийн эрүүл мэнд, байгаль орчинд хор хөнөөлтэйг батлан харуулсаар байгаа.
Гэхдээ хоол хүнсний орц найрлагаа ингэж өөрчилбөл ямар үр дүнтэйг тоогоор илэрхийлсэн анхны тохиолдол энэ болж байна.
Япон, Австралийн эрдэмтдийн баг судалгаандаа дэлхийн 130 гаруй улсын иргэдийн эрүүл мэндийн түүхэн мэдээллийг ашиглажээ.
Малын махыг загасаар сольсон тохиолдолд дэлхий даяар жил бүр 750,000 хүний амь аврагдаж, хүмүүсийн дунд хоол хүнстэй холбоотой өвчлөл эрс буурах тооцоо гарсан байна.
Ялангуяа ийм төрлийн загасны олдоц их, үнэ хямд тул бага болон дунд орлоготой улс орнуудын иргэдийн эрүүл мэндэд тустайг судлаачид онцолжээ. Бас зүрх судасны өвчлөл өндөртэй улс орнуудад чухал ач холбогдолтойг дурдсан байна.
“Хүмүүсийн эрүүл мэнд, манай гарагийн эрүүл мэндийг сайжруулахын тулд бид малын махны хэрэглээг хязгаарлаж, байгаль орчинд ээлтэй эрүүл хоол хүнс рүү шилжих шаардлагатай. Далайн бүтээгдэхүүн нь малын махтай харьцуулахад шим тэжээлийн өндөр агууламжтайгаас гадна хоол хүнсний дэглэмээс үүдэлтэй халдварт бус өвчнөөс сэргийлэх ач холбогдолтой” гэж BMJ Global Health сэтгүүлд нийтлэгдсэн судалгааны тайланд өгүүлжээ.
Тэжээлийн загас нь амьтны гаралтай бүх хоол хүнснээс нүүрстөрөгчийн ялгаруулалт хамгийн багатай эх үүсвэр болохыг судлаачид тайландаа онцолсон байна.
Судлаачид дэлхийн 137 улсад 2050 он хүртэл малын махыг тэжээлийн загасаар орлуулах дөрвөн хувилбар тооцоог гаргажээ.
Ингэхэд жил бүр хоол тэжээлтэй холбоотой нас баралтыг 750,000 хүртэл бууруулж, эрүүл бус хооллолтоос шалтгаантай өвчлөлийг 15 саяар бууруулах тооцоо гаргасан байна.
Эх сурвалж: The Guardian
