Бид ямар уур амьсгалтай оронд амьдарч байгаагаа таньж, мэдэх нь чухал байна.

Халуун орны кино үзэж, хүмүүстэй нь өөрсдийгөө жишиж ойлгосныгоо хөгжил хэмээн харж байгаа нь эргээд та бүхний эрүүл мэндэд эрсдэл учруулж болзошгүйг тэрбээр анхааруулж байв.

Энэ талаар хэлэхдээ “Эмч нь өчигдөр гудамжаар явж байгаад бараг цочлоо. Яг зун болчихсон юм шиг нимгэн хувцаслалттай залуу бүсгүйтэй таарсан.

Тэр бүсгүй нимгэн өмд өмсөөд шилбээ гаргачихсан, дээрээс нь пүүзтэй явж байхыг харлаа. Мөсөн дээгүүр тэнцвэрээ олох гээд явж байсан.

Хэдийгээр машинаасаа буугаад дотогш орох гэж байгаа ч Монгол орны хавар ямар онцлогтой, ямар эрсдэл тохиолдож болох вэ гэдгийг ойлгоогүй байна.

Би ямар цаг агаартай оронд хүн болоод төрчихсөн байгаа юм бэ гэдэг мэдрэмжийн тухай ойлголт, мэдээлэл хомс байгаа нь илт. Залуу үеийнхэн маань бүгд л ийм байгаа байх гэж эмзэглэсэндээ энэхүү зөвлөгөө, мэдээллийг хүргэж байгаа юм.

Бусад улс орныг бодвол манайд хаврын улирал урт үргэлжилдэг. Хахир буюу салхины эрчим өндөр байдаг. Энэ үед бид өөрсдөө гэнэдэж хувцсаа нимгэлдэг. Ингэж нимгэлснээрээ эрүүл мэнддээ эрсдэл учруулж, өвчин олох магадлал өндөр болно” гэлээ.

“Нарны ээлт зун мэт боловч доороос жиндүүлэх нөлөө нь өвөл шиг хэвээр байгаа”

Мөн тэрбээр “Хаврын салхи хавирга нэвт гэж анхааруулж ирсэн үг бий. Үүнийг тайлбарлая.

Хаврын улиралд хөрс гүн хөлдсөн хэвээр байдаг бөгөөд метр, метр хагаст хөлдөлт явагддаг. Гэвч нарны ээлт эргээд зун мэт боловч доороос жиндүүлэх нөлөө нь өвөл шиг хэвээр байгаа.

Энэ бүхэн ойролцоогоор дөрвөн сарын сүүл хүртэл үргэлжлэх учраас сэрэмжтэй хандаж, доороосоо битгий нимгэл. Хувцсаа нимгэлэх цаг чинь болоогүй.

Уулын орой хэсэгт салхины эрчим их байна. Доороос бие рүү хандах салхины нөлөөлөл өндөр байдаг онцлогтой. Өөрөөр хэлбэл бид далайн түвшнээс 1,000 метр дээр оршин амьдарч байна. Үүний зэрэгцээ Сибирийн сэрүүн салхи мөд уярах болоогүй.

Салхи доороос цоргиж ордог учраас хормойтой хувцас өмссөн бол бүс бүсэлдэг учиртай. Хаврын салхи хавирга нэвт гэдэг үгийн цаад утга энэ. Дээш цээж хэсэгтээ доороос цоргисон хаврын салхийг битгий оруулаарай гэсэн утгатай. Хэлц үг чинь өөрөө ингэж тайлагддаг юм шүү” гэв.

“Хаврын цагт хүний хөгшрөлт хурдасдагаараа бусад улирлаас онцлогтой”

Үргэлжлүүлэн “Монголчуудын хувцаслалтын соёл, биеэ авч яваа байдал, идэш ууш өөрөө эргээд хэдэн мянган жилээрээ зохицож ирсэн зүйл.

Харамсалтай нь бид халуун орны кино үзэж, халуун орны хүмүүстэй өөрсдийгөө жишиж ойлгож байна. Аливаад авах гээхийн ухаанаар хандаж бодолтой байхыг хүсье. Яагаад гэвэл нэг хавар даарснаас үүдэлтэй өвчлөл удаан эдгэрдэг.

Учир нь таны бие өөрөө маш их ядарчихсан байгаа. Тийм учраас өвчин илүү их шунаж, эдгэрэх явц удна. Ядруу биед тань дараа болох нөлөө их учраас тэр тусмаа биеэ бөөцийлж, хамгаалж байгаарай.

Хаврын цагт хүний хөгшрөлт хурдасдагаараа бусад улирлаас онцлогтой. Хүний тамирыг шавхсан, хөгшрөлт хурдасдаг улирал гэсэн үг.