Цахим сүлжээнд чөлөөтэй нэвтрэх эрхийг 16 наснаас дээш байлгах тогтоолыг Европын парламент баталжээ.
Энэхүү шийдвэрийг Францын Страсбург хотод Лхагва гаригт (2025.11.26) болсон уулзалтын үеэр гаргасан байна. Улмаар хууль тогтоогч нар нийгмийн сүлжээ, видео хуваалцах платформ, хиймэл оюун ухааны компани зэрэгтэй хамтарч, дижитал сүлжээ ашиглаж эхлэх насыг 16 болгохыг санал болгох болсон.
Мөн 13-15 насны хүүхдүүд зөвхөн эцэг эх, асран хамгаалагчийн зөвшөөрлөөр цахим сүлжээ ашиглах боломжтой болгоно. Ингэснээр 13-аас доош насны хүүхдүүдийг нийгмийн сүлжээ ашиглахыг зөвшөөрөхгүй.
Парламент насанд хүрээгүй хүмүүсийг онлайн донтолт, цахим дээрэлхэл, насанд нь тохиромжгүй контент гэх мэт зүйлсээс хамгаалах шаардлагатай байгааг дурдсан.
Энэхүү тогтоолыг заавал биелүүлэх албагүй ч интернэт ашиглаж буй хүүхдүүдийг хамгаалах гэсэн Европын холбооны хэлэлцүүлгийн нэг хэсэг юм. Европын комиссын ерөнхийлөгч Урсула фон дер Лейен энэ оны эхээр насанд хүрээгүй хүмүүсийн нийгмийн сүлжээнд нэвтрэх эрхийг хянах талаар судалгаа явуулах баг бүрэлдэхүүн байгуулна гэж мэдэгдсэн байдаг.
