13-аас доош насныхныг нийгмийн сүлжээ ашиглахыг хориглож, 13-16 насныхны хэрэглээнд технологийн хязгаарлалт тавина

“Нийгмийн сүлжээнд хүүхдийн аюулгүй байдлыг хангах тухай” хуулийн төслийн хэлэлцүүлэг өнөөдөр болж байна.

Уг хэлэлцүүлгээр хүүхдүүдийг нийгмийн сүлжээ ашиглахад ямар зохицуулалт хийх вэ, хэрхэн хамгаалах вэ талаар тал талын байр суурийг сонсох юм.

13-аас доош насныхан болон 13-16 хүртэлх гэсэн ангиллаар судалж үзэхэд хүүхдүүд өдөр 4-6 цагийг цахим орчинд өнгөрүүлж байгаа аж.

“Нийгмийн сүлжээнд хүүхдийн аюулгүй байдлыг хангах тухай” хуулийн төслийн зорилго нь

Нийгмийн сүлжээнд хүүхдийг эрсдэлээс урьдчилан сэргийлэх, хамгаалах

Аюулгүй байдлыг хангах

Гомдол, мэдээлэл шийдвэрлэх юм байна.

Хуулийн төсөлд 13-аас доош насныхныг нийгмийн сүлжээ ашиглахыг хориглох, 13-16 насныханд технологийн хамгаалалт хийхээр тусгажээ. Түүнчлэн 13-16 насныханд технологийн хамгаалалтаас гадна багш, эцэг эхийн хяналт байх ёстой талаар ч судалж байгаа аж.

Одоогоор 13-аас доош насны хүүхдүүдийн 90 хувь нь нийгмийн сүлжээг ашиглаж байна. Насаа буруу оруулж Фэйсбүүк, Инстаграм, Х, ТикТок зэрэг хаяг нээн ийнхүү ашиглаж байгааг технологийн аргаар хязгаарлах юм байна.

Түүнчлэн хуулийн төсөл боловсруулах явцад хүүхдүүд өөрсдийнх нь зураг, бичлэгийг зөвшөөрөлгүйгээр аливаа баярын мэндчилгээ, уулзалт, уралдаан тэмцээн, олимпиадын мэдээнд ашиглаж байгаад гомдолтой байгаагаа хэлжээ.