Индонезын Засгийн газар 16 хүртэл насны хүүхдүүдэд цахим сүлжээ хэрэглэхийг энэ сараас эхлэн хориглоно. Тэд TikTok, YouTube-ийн удирдлагуудад төлөвлөгөөгөө урьдчилан мэдэгдэж, 16 нас хүрээгүй хүүхдүүд эдгээрийг хэрэглэх нь өндөр эрсдэлтэй гэжээ.
Индонезын Харилцаа холбоо, дижитал асуудал хариуцсан яам даваа гарагт гаргасан мэдэгдэлдээ “Roblox, Instagram, Google’s YouTube, TikTok, ByteDance шинэ зохицуулалтад багтсан” гэжээ.
Үүний дараа YouTube компани “Бид олон сая Индонезчуудад сургалтын, танин мэдэхүйн бичлэгүүд хүргэж, эцэг эхчүүдэд боловсрол олгосоор ирсэн. Бид цаашид Засгийн газартай нягт хамтран ажиллаж, залуусыг дижитал дэлхийгээс хамгаалах ажлаа үргэлжлүүлнэ” гэсэн байна.
БНХАУ-ын компани болох TikTok илүү сайн ойлголцохын тулд яамтай хамтран ажиллаж байна гээд манай талбарт өсвөр насны хүүхдүүд илүү аюулгүй байж, бид тэдний хувийн нууцыг чанд хамгаалдаг гэжээ.
Шинэ зохицуулалт энэ сарын 28-наас хүчин төгөлдөр болно.
Meta (Instagram, Facebook-ийг эзэмшигч толгой компани) Засгийн газрууд хүүхдүүдэд хориг тавихдаа болгоомжтой байх хэрэгтэй. Ингэснээр тэднийг илүү аюултай, зохицуулалтгүй талбар руу түлхэж болзошгүй. Бид өсвөр насныханд зориулсан, аюулгүйн тохиргоотой гэжээ.
Австралийн Засгийн газар хүүхдүүдийн аюулгүй байдал, сэтгэцийн эрүүл мэндийг харгалзан олон нийтийн цахим сүлжээнд хаяг нээхийг өнгөрсөн арванхоёрдугаар сард хориглосон. Гэвч зарим компани үүнийг эсэргүүцэн, шүүхэд ханджээ.
Европын холбоо мөн ийм шийдвэр гаргах, эсэхийг шийдэхээр шинжээчийн баг томилжээ. Тэд Австралийн шийдвэрийн хэрэгжилтийг судлан, хуулийн ямар сорилтууд тулгарч байгааг ойроос ажиглан судалж байна.
Франц, Дани, Грек, Испани Европын холбооноос нэн даруй шийдвэр гаргаж, хүүхдүүдийн хэрэглээг хориглохыг шаарджээ. Дэлхийн хамгийн их хүн амтай улс болох Энэтхэг ч энэ талаар судалгааг эхлүүлсэн байна.
Эх сурвалж: thejakartapost
