УИХ-ын дарга Н.Учралаас өгсөн зөвлөмжийн дагуу өнөөдөр /2025.11.27/ орой Аж үйлдвэр, эрдэс баялгийн сайд Г.Дамдинням, УИХ-ын гишүүн Б.Жаргаланг “болзоо”-нд урих үүрэг хүлээгээд байна.
Энэ талаар УИХ-ын дарга Н.Учрал “Б.Жаргалан гишүүн үндэслэлтэй асуудал хөндөж байна, өнөөдөр орой Г.Дамдинням сайд Б.Жаргалан гишүүнд хуулийн төслөө тайлбарлаж өгнө шүү. Өнөөдөр орой та хоёр уулзана. Нэн яаралтай горимоор хууль оруулж ирчихээд байна, тэгэхээр нэн яаралтайгаар уулзах хэрэгтэй” гэв.
УИХ-ын чуулганы өнөөдрийн нэгдсэн хуралдаанаар Сатратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн төслийг яаралтай горимоор хэлэлцэж эхэлсэн юм. Үүнийг УИХ-ын гишүүн Б.Жаргалан шүүмжлэв. Тэрбээр “Өмнөх Засгийн газрыг би гишүүдийг мэдээллээр хангаагүй байж яаралтай горимоор янз бүрийн хууль, тогтоомжийн төсөл оруулж ирээд байна” гэдэг шүүмжлэлийг хэлдэг байсан. Шинэ Засгийн газрын хувьд энэ арга барил руу шилжиж байгаад дурамжхан байна.
Гишүүд мэдээлэлтэй танилцах хэрэгтэй, олон нийт ч мэдээлэлтэй болох ёстой. Орж ирж байгаа төслийг харахаар шаардлагагүй асуудлаар бүхэл бүтэн хуулийн төсөл боловсруулаад ороод ирж байна.
Засгийн газар өөрөө хариуцлагаас зугтах гэдэг юм уу, гүйцэтгэх засаглалын хүрээнд шийдвэр гаргаад явах боломжтой зүйлүүд дээр заавал УИХ- аар хууль батлуулаад дараа нь УИХ -аас баталсан хуулийн хүрээнд үйл ажиллагаа явуулсан гэж гэм зэмээ залруулах гээд байдаг юм уу ийм сонин жишиг тогтлоо.
Хуулийн төслийнх нь нэр нь Стратегийн ач холбогдол бүхий бүтээгдэхүүний хангамж нийлүүлэлт гээд нэг их сүржин нэртэй, тэгсэн хэрнээ цөөхөн хэдхэн заалттай. Шатахуун импортлогч хэдэн компанид Монголбанкнаас зээл олгох гээд байх шиг байна. Тэгэнгүүтээ төв банкны хараат бус байдалд халдаад төв банкны тодорхой хуулийн заалтуудад хамаарахгүй гэдэг зүйл оруулж ирээд байна. Гүйцэтгэх засаглалын эрх мэдлийн хүрээндээ шийдээч ээ.
УИХ- аар хууль баталдаг, дараа нь шатахууны савны хулгай гээд яривал УИХ -руу заах гээд байгаа юм уу. Эрх ашгийн зөрчил үнэртсэн хууль орж ирсэн.
Тусгай зөвшөөрөл эзэмшигч компаниуд 30 гаруй жил үйл ажиллагаа явуулахдаа шатахуун нөөцлөх саваа барьчихдаггүй юм уу. Хэчнээн төгрөгийн зээл олгох гээд байгаа юм бэ. Урт хугацааны байдлаар хандахгүй, тулгасан, гал унтрах байдлаар хандаж байна. Нэг их наяд жаран тэрбумын санхүүжилтийн асуудлыг ярьж байна. Монголбанкнаас гарах зээл ямар хүүтэй байх, хэр хугацаанд гарах, санхүүжилт авах компанид тавих шаардлага нь ямар байх юм. Мөн нөөцийн сав нь хаана байх гэхчлэн тодорхой мэдээлэл огт алга. Ер нь цаашдаа урт хугацааныхаа асуудлыг ярих хэрэгтэй. Дандаа “гал унтраах” байдлаар асуудалд хандмааргүй байна” гэж шүүмжилсэн юм.
