Дайны улмаас эх орноосоо дүрвэн гарсан украин залуу Японд мэргэжлийн сүмогийн дээд зиндааны тэмцээнд түрүүлсэн анхны украин хүн боллоо.
Данило Явгусишин сүмогийн дэвжээнд Аонишики хэмээх нэрээрээ алдаршсан ба 2022 онд Орос Украин руу дайрсны дараа 18 настайдаа Японд иржээ.
Одоо 21 настай тэрбээр анх удаа Эзэн хааны цомыг хүртсэн украин хүн болохоос гадна мөн Европ тивээс найман жилийн дараа энэ шагналыг хүртсэн бөх боллоо. Мөн тэрээр сумогийн хоёр дахь хамгийн өндөр зэрэглэл болох Озэкид дэвшихээр зэхэж буй бөгөөд энэ нь сүмогийн түүхэн дэх хамгийн хурдан дэвшил болох магадлалтай гэж үзэж байна.
Аонишики 15 өдрийн башёг 12 ялалт, 3 өвдөг шороодсон амжилтаар өндөрлөж, аваргын шийдвэрлэх барилдаанд 26 настай Ёкозүна Хошорюү С.Бямбасүрэнг давж, цомын эзэн болжээ.
Шагнал гардуулах үеэр түүнээс “Сүмод гурван жил барилдсаны дараа энэ амжилтад сэтгэл хангалуун байна уу” гэж асуухад “Үгүй ээ, энэ бол зөвхөн эхлэл гэж бодож байна” хэмээн хариулжээ.
Аонишики нэрэнд япон хэлний “цэнхэр” гэсэн ханз ордог нь Украины далбаатай холбон өгсөн утга аж. Аонишики бол сүмод барилдаж буй хоёр дахь украин бөх. Тэрбээр 7 настайдаа сүмогоор анх хичээллэж, түүнээс өмнө жүдо болон чөлөөт бөхөөр хичээллэдэг байжээ.
Тэр өсвөрийн сүмогийн тэмцээнүүдэд өндөр амжилт үзүүлсэн бөгөөд Оросын довтолгооны дараа гэр бүлийн хамт Герман руу дүрвэсэн байна.
Япон хэл мэдэхгүй ч өмнө нь өсвөрийн тэмцээнд танилцсан их сургуулийн сүмогийн клубийн ахлагчийн тусламжтайгаар ганцаараа 2022 оны дөрөвдүгээр сард Япон руу нүүжээ.
Хэдийгээр мэргэжлийн сүмод орсон нь саяхан ч түүний ур чадвар, тасралтгүй ахиц, өрсөлдөх чадвар нь Япон төдийгүй дэлхий даяар олон шүтэн бишрэгчтэй болгожээ. Тэрбээр ховор техникүүдийг ашиглан өрсөлдөгчдөө давдаг тул мэргэжлийн болон сонирхогчдын талархлыг ихээхэн хүлээж, Аонишикиг ирээдүйд Европын анхны ёкозүна болж магадгүй хэмээн олон хүн харж байна.
Эх сурвалж: BBC
