Бензиний үнэ 600 төгрөгөөр өсөхөд өргөн хэрэглээний барааны үнэ хэрхэн өссөн талаар өмнө сард бид мэдээлсэн. Тэгвэл өргөн хэрэглээний барааны үнийн талаарх мэдээллийг өмнөх сарынхтай харьцууллаа. Сарын хугацаанд шатахууны үнэ нэмэгдээгүй ч өргөн хэрэглээний хүнсний бүтээгдэхүүний үнэ өссөөр байна. Тухайлбал, “Атар талх” гэхэд 100 төгрөгөөр нэмэгдсэн бол үхрийн махны үнэ 1500 төгрөгөөр нэмэгджээ. Харин ургамлын тос 1500-2000 төгрөгөөр нэмэгдсэн байна.
Мах, өндөг
-Одоогийн байдлаар хонь, адууны махны үнэ өмнөх сараас 500-1000 төгрөгөөр буурчээ. Хонины нэг кг мах наймдугаар сарын 3-нд 11000 төгрөг байсан бол есдүгээр сарын 2-нд 10500, адууны мах 11000 байсан бол одоо 10000 төгрөг болсон байна. Харин нэг кг үхрийн мах 12000 төгрөг байсан бол 13500 төгрөг болон өсчээ.
-Өндөг наймдугаар сарын 3-нд 400 төгрөг байсан бол одоо мөн адил 400 төгрөгөөр зарагдаж байна.
-Цагаан будаа
Цагаан будаа нэг кг нь наймдугаар сарын 4-нд 3500 төгрөг байсан бол 3600 төгрөг болж 100 төгрөгөөр өссөн байна.
Ургамлын тос
Нэг литр ургамлын тос 5000 төгрөг байсан бол 6500-7000 төгрөгийн хооронд худалдаалж байна.
Сүү, сүүн бүтээгдэхүүн
Сүү ХК компанийн нэг литр сүү наймдугаар сарын 4-нд 2800 төгрөг байсан бол энэ сард ч үнэ хэвээрээ байна.
Гурил
-Гурилны үнийн тухайд сарын хугацаанд үнийн өөрчлөлт гараагүй байна. Тодруулбал, нэгдүгээр зэргийн савласан гурил нэг кг нь 1400 төгрөг байсан бол одоо мөн адил 1400 төгрөгийн үнэтэй байна. Түүнчлэн, хоёрдугаар зэргийн савласан гурил нэг кг нь наймдугаар сарын 4-нд 1000 төгрөг байсан бол мөн адил есдүгээр сарын эхээр 1000 төгрөг байна.
Талх
Сарын өмнө “Атар талх” 1300 төгрөгийн үнэтэй байсан бол одоо 1400 төгрөг болж өсчээ.
-Хүнсний ногоо
-Монгол төмс нэг кг нь 1000 төгрөг байснаас 200 төгрөгөөр буурч 800, лууван 3000 төгрөг байснаас 500 төгрөгөөр буурч 2500 болжээ. Сонгино 3000 төгрөг байсан бол 2500, манжин 3200 төгрөгөөс 2500 төгрөг болж буурсан байна.
