Ханиад томуу хүндэрч, хүүхдийг эмнэлэгт ор хүрэлцэхгүй байна гэх шүүмжлэл бий. Энэ асуудлаар УИХ-ын гишүүд салбарын сайдаас тодруулахад, Эрүүл мэндийн сайд Т.Мөнхсайхан “Томуу, томуу төст өвчний дэгдэлт үнэхээр их байна. Өмнөх жилүүдэд байгаагүйгээр томуугаас урьдчилан сэргийлэх вакцин хийж, хэрэгжүүлснээр өдий зэрэгтэй байна.
Ард, иргэдийн хариуцлага, эрүүл мэндийн боловсрол тааруу байна.
Томууг туссаны дараа эмчилдэг эмнэлгийн асуудал биш, томууг тусахгүй байхын тулд халдвар хамгааллын дэглэмээ хэрхэн барих юм гэдэгт бид түлхүү анхаарсан.
Тиймээс өнөөдрийн байдлаар ор хүрэхгүй, хэвтэж чадахгүй хэмжээнд оччихоогүй байна.
Бид 1300 орыг томууд бэлтгэсэн. Өнөөдрийн байдлаар хэвтэн эмчлүүлж буй 1250 хүүхэд бий.
Цаашид нөхцөл хүндрэх эрсдэл байна.
Үүнтэй холбоотой, бодлого, арга хэмжээ авч хэрэгжүүлж байгаагийн нэг нь ЭХЭМҮТ-ийн удирдлагыг сольсон. Энэ төв бол үндэсний хэмжээнд үйл ажиллагаа явуулах ёстой байгууллага.
Зөвхөн эмнэлгийн хэмжээнд үйл ажиллагаа явуулж ирсэн учраас хүний нөөцийн бодлого нь тодорхойгүй нөхцөл үүссэн учраас туршлагатай, мэдлэг боловсролтой хүнээр удирдлагыг сольсон. Гэхдээ энэ хүн нь дотооддоо ажиллаж байсан туршлагатай эмч. Энэ бол томуугийн бэлтгэлийн нэг бодлого” гэлээ.
