Дэлхийн хамгийн том төмрийн хүдрийн үйлдвэрлэгч Rio Tinto (RIO) компани пүрэв гарагт гэнэтийн мэдэгдэл хийж, одоогийн Гүйцэтгэх захирал Якоб Стаушолм энэ оны сүүлээр албан тушаалаасаа огцрохоо зарлалаа.
Дотооддоо болон гадаадын нэр дэвшигчдийг хамарсан залгамж халааны төлөвлөлт идэвхтэй явагдаж байгаа бөгөөд Rio Tinto-ийн ТУЗ нь гүйцэтгэх удирдлагын хайлтын MWM Consulting компанитай хамтран нэр дэвшигчдийн жагсаалтыг боловсруулж байна.
Дотоод нэр дэвшигчдэд Болд Баатар, Саймон Тротт, Жером Пекресс нар багтаж байгаа аж.
Монгол удирдагч дэлхийн тавцанд
Эдгээр нэр дэвшигчдийн дунд онцгой анхаарал татаж буй хүн бол Болд Баатар юм. Тэрээр дэлхийн уул уурхайн томоохон компанийн гүйцэтгэх хороонд багтсан цорын ганц монгол хүн бөгөөд 2013 онд Rio Tinto-д элссэнээс хойш таван удаа дэвшиж, 2023 оны 9-р сард Коммерцийн захирлаар томилогдсон. Энэ албан тушаал нь түүнийг компанийн дэлхийн стратеги, арилжааны түншлэл, хэрэглэгчийн харилцааны тэргүүн эгнээнд авчирсан юм.
Rio Tinto-ийн ирээдүйн замнал
Шинэ Гүйцэтгэх захирал нь Rio Tinto-ийн үйл ажиллагааг өргөжүүлэхээс гадна байгаль орчин, нийгмийн хариуцлага, засаглал (ESG) болон геополитикийн эрсдэлүүдийг тэнцвэртэй удирдах шаардлагатай болно. Тус компани 2024-2026 оны хооронд жил бүр 10 тэрбум ам.долларын хөрөнгө оруулалт хийхээр төлөвлөж байгаа бөгөөд үүнд Гвиней дахь удаан хугацаанд хойшлогдсон Симанду төмрийн хүдрийн төсөл голчлон багтаж байна.
Түүхэн мөч
Rio Tinto шинэ удирдагчаа эрэлхийлж буй энэ үед Болд Баатарын нэр дэвшигчдийн нэгээр нэрлэгдэж байгаа нь зөвхөн компанийн хувьд төдийгүй Монгол Улсын хувьд түүхэн үйл явдал юм. Дэлхийн нөлөө бүхий уул уурхайн компанийн удирдлагын албан тушаалд монгол хүн нэр дэвшиж байгаа нь олон улсын тавцанд Монголын нэр хүндийг өсгөж буй чухал үйл явдал юм.
Эх сурвалж: INSIDE MONGOLIA
