![\"\"](http://undesten.mn/uploads/posts/2015-10/1444979273_297289.jpg "\\"\\"")
Хүний зүрх эд эсэд судсаар хүчилтөрөгч, шим тэжээлийг дамжуулан үргэлж ажиллаж биеийн ерөнхий чадварыг тогтмол хэмжээнд хадгалж амьдралын хэвийн нөхцөлийг хангадаг.
Гэвч бидний ихэнх нь өөрийнхөө зүрх судасны системийг хэвийн хэмжээнд өндөр чадвартай байлгахад тун бага анхаарал тавьж байна. Биеий жин нэмэгдэж хэт таргалах, архи хэтрүүлэн хэрэглэх, сэтгэл мэдрэлийн их хэмжээний цочролд орох нь зүрх судасны системийг өвчлөхөд хүргэдэг.
Иймээс биеийн тамирын дасгал хөдөлгөөн хийж зүрх судасны системд тодорхой ачаалал өгч дамжуулж байх хэрэгтэй. Хүний зүрхэнд зохих хэмжээний дасгалжилт дутаж хэвийн хэмжээнээс байнга доогуур дэглэмээр ажиллах юм бол биеийн эд эрхтнийг хүчилтөрөгч, шим тэжээлээр хангаж чадахгүйд хүрдэг. Урт наслаж олон жил эрүүл саруул амьдрахад зүрхээ байнга тогтмол дасгалжуулж байхад анхаарах хэрэгтэй.
Байнгын бэлтгэлтэй дасгалжсан хүмүүсийн зүрх тайван үедээ харьцангуй цөөн агшиж /нэг минутанд 60 орчим удаа/ харин агшилт тутамдаа хүчтэй агшиж бие организмыг цусаар бүрэн хангаж байдаг. Зүрх өөрөө ийм дэглэмээр агшиж байхдаа хооронд нь сайн амарч амжиж цусны нарийн судсуудаар цус шим тэжээлийг хангалттай шахаж бие организмын ажлын өндөр чадварыг хадгална.
Хүмүүс 35-40 наснаас эхэлж өөрийн эрүүл мэндийнхээ төлөө тэр бүр анхаарал бага тавьж биеийн тамираар хичээллэхгүй, залхуу, хувийн зохион байгуулалт муу, зориг тэвчээр дутаж өөрийнхөө санааг амраадаг дутагдалтай. Хэрвээ хүн өдөр бүр 10 минут гимнастик хийвэл минут тутамд зүрхний цохилтыг арваар цөөрүүлнэ. Жилд зүрхний ажиллагааг таван сая цохилтоор бууруулж болох юм. Ингэснээр зүрх судасны олон төрлийн өвчнөөс сэргийлж болох бөгөөд ийм замаар эрүүлжин, зүрхний шигдээс болохоос ч сэрэмжилж болдог ажээ. Боломжоороо алхаж, гүйж байх нь зүрхний хамгийн сайн эм юм.
Таныг өдөр тутам дараах дасгалаар хичээллэж зүрх судасны системээ дасгалжуулж байхыг зөвлөж байна.
Нэг: Гадаа явган явж байх үедээ 300-400 м хэсэг замыг сонгож / бага зэргийн өгсүүр байвал бүр ч сайн/ хурдан хугацаанд алхан туулахад зүрх судасны үйл ажиллагаанд чухал дасгалжилт болно.
Хоёр: Зүрхний үйл ажиллагаанд дээрх хэмжээний ачаалалтыг өгөхдөө мөн хурдхан алхаад 4-5 давхарт шатаар өгсөж гарч байвал бүр ч сайн.
Гурав: Гэр орондоо байхдаа 20-30 удаа сууж босвол зүрхэнд зохих дасгалжилт өгнө.
Хамгийн гол нь эдгээр дасгалыг хөнгөн, их ачаалал өгөхгүйгээр өдөр тутам давтан хийж байвал зүрхний үйл ажиллагаанд сайнаар нөлөөлнө. Цаашид бие организм дасч ирвэл дасгалаа өдөрт 4-5 удаа давтаж болно. Дасгалыг давтах үед зүрхний цохилтын тоогоор өөртөө хяналт тавьж чаддаг байх хэрэгтэй.
Та одоо 20 удаа сууж босоход судасны цохилт
25% нэмэгдвэл онц
25-50% нэмэгдвэл сайн
50-75 % нэмэгдвэл дунд
75%-дээш бол муу гэж үзнэ.
Энэ үзүүлэлтээр өөрийн зүрхнийхээ үйл ажиллагаа, түүний дасгалжилтын байдалд хяналт тавьж хичээллэх дасгалаа тохируулах хэрэгтэй.
Мөн зүрхний үйл ажиллагааг нимбэг сайжруулдаг тул эфирийн тосоор баялаг нимбэгийн хальсыг өдөр бүр зажилж байгаарай. Мөн зүрхний шигдээсээс хамгаалах нэг арга нь гашуун бүйлс байнга идэх юм. Бүйлсний нэг үр гэхэд л бүхэл өдрийн турш судсан дахь цусны эргэлтийн зөв урсгалыг хангана. Харин зүрх судасны нарийсал өвчний үед зүрх орчмын арьсанд жодоо модны тос түрхэж иллэг хийнэ. Мөн өдөрт нэг халбагаар ууж болно.
/Эрүүл мэндийн ширээний номоос/
