Монгол Улс, Бүгд найрамдах социалист Вьетнам улсын Засгийн газар хоорондын комиссын 16 дугаар хуралдаан өнөөдөр Улаанбаатар хотноо болж байна.
Монгол Улс, Бүгд найрамдах социалист Вьетнам улсын Засгийн газар хоорондын комиссын 16 дугаар хуралдаанаар худалдаа, эдийн засаг, хөдөө аж ахуй, эрүүл мэнд, боловсролын салбарын хамтын ажиллагааг эрчимжүүлж, харилцан ашигтай хамтын ажиллагааг хөгжүүлэхэд чиглэгдэж байна.
Хуралдааны эхэнд Монгол Улс, Бүгд найрамдах социалист Вьетнам улсын Засгийн газар хоорондын комиссын дарга, Хүнс хөдөө аж ахуй хөнгөн үйлдвэрийн сайд П.Сэргэлэн Монгол Улсын нийгэм, эдийн засгийн байдлын талаар мэдээлж, ЗГХК-ын 15 дугаар хуралдааны шийдвэрийн хэрэгжилт, цаашид авах арга хэмжээний талаар танилцуулав.
Тэрээр Эдийн засгийн бодит өсөлт 2015 онд 2.4 хувь, 2016 онд 1.3 хувьд хүрсэн байна.
Засгийн газар байгуулагдсан цагаас эхлэн нэн тэргүүнд улс орны нийгэм, эдийн засагт тулгамдаад буй хүндрэлийг даван туулахаар тал бүрийн арга хэмжээ авч ажиллаж байна.
Бид Засгийн газрын үйл ажиллагааны мөрийн хөтөлбөр, Монгол Улсын тогтвортой хөгжлийн үзэл баримтлалын дагуу \”Эдийн засгийг сэргээх хөтөлбөр”-ийг баталсан.
Эдийн засгаа сэргээх, төсөвт хэмнэлт хийх, үндэсний үйлдвэрлэлээ дэмжих бодлогыг шат дараатай хэрэгжүүлж эхэлсэн бөгөөд 2016 оны төсвийн урьдчилсан гүйцэтгэлээр төсвийн орлого анх удаа 504 тэрбум төгрөгөөр давж биелсэн гэв.
2016 оны байдлаар Монгол-Вьетнамын хоорондын худалдааны нийт бараа эргэлт 43сая ам.доллар, үүнээс экспорт 2.9 сая ам.доллар, импорт 40.1 сая ам.доллар байгааг дурдав.
ХОЁР УЛСЫН ХУДАЛДААНЫ ЭРГЭЛТИЙГ 2020 ОНД 70 САЯ АМ.ДОЛЛАРТ ХҮРГЭНЭ
Худалдаа, эдийн засаг, соёл, шинжлэх ухаан, техникийн хамтын ажиллагааг 2017-2019 онд Худалдаа, эдийн засаг, хөдөө аж ахуйн салбарын хамтын ажиллагааны хүрээнд хоёр талын худалдааны эргэлтийг 2020 онд 70 сая ам.долларт хүргэх, Монгол Улсаас ямааны гүн хөлдөөсөн мах, дулааны аргаар боловсруулсан мах, арьс шир, ноос, ноолууран бүтээгдэхүүн Вьетнамд, Вьетнамаас гүн хөлдөөсөн далайн бүтээгдэхүүн, бэлэн хувцас, өргөн хэрэглээний бараа худалдан авах боломжтой.
Эдгээр ажлыг бодит ажил хэрэг болгоход хоёр улсын яам онцгойлон анхаарч дэмжлэг үзүүлэх шаардлагатай байгааг тэмдэглэв.
Монгол Улсын Гадаад харилцааны сайдын Вьетнам Улсад хийсэн айлчлалаар мах, махан бүтээгдэхүүнийг Вьетнам Улсад экспортлоход чухал ач холбогдолтой баримт бичигт гарын үсэг зурсан.
Энэ удаагийн ЗГХК-ын хуралдаанаар Хүнсний эрүүл ахуйн Гэрчилгээг тохиролцсоноор хоёр улсын хооронд хүнсний бараа, бүтээгдэхүүн харилцан нийлүүлэх хууль, эрх зүйн орчин бүрдэж байна.
Монгол Улс, Бүгд найрамдах социалист Вьетнам улсын Засгийн газар хоорондын комиссын дарга, Хүнс хөдөө аж ахуй хөнгөн үйлдвэрийн сайд П.Сэргэлэн Вьетнам улсын Хөдөө аж ахуй, хөдөөгийн хөгжлийн сайд Нгуен Суан Гыонг-тэй ЗГХК-ын 16 дугаар хуралдааныг хамтран зохион байгуулсанд баяртай байгааг илэрхийлж, энэхүү яриа хэлэлцээ нь Монгол, Вьетнам найрсаг харилцаа, хамтын ажиллагааг идэвхжүүлэхэд түлхэц болно гэдэгт итгэлтэй байгаагаа илэрхийлэв.
Монгол Улс, Бүгд найрамдах социалист Вьетнам улсын Засгийн газар хоорондын комиссын хуралдаан салбар хуралдаанаар үргэлжилж байна.
Эх сурвалж: ХХААХҮЯ
