Ж. Энхцэцэг: Иргэд томуугийн вакцин хийлгэсэн бол ханиад хүрэхгүй гэсэн буруу ойлголттой байна

Нийслэлийн эрүүл
мэндийн газраас томуу, томуу төст өвчний үед авч хэрэгжүүлэх арга хэмжээ, бэлэн
байдлыг хангах ажлын хүрээнд улирлын томуугийн вакцинаар
дархлаажуулах ажлыг зохион байгуулж байгаа. Энэ талаар
нийслэлийн Эрүүл мэндийн газрын дархлаажуулалтын мэргэжилтэн Ж.Энхцэцэгтэй
ярилцлаа.

-Нийслэлийн
хэмжээнд хэчнээн хүнд томуугийн вакцин хийгээд байна вэ?

-Нийслэлийн
хэмжээнд томуугийн эсрэг дархлаажуулалтын ажлыг зохион байгуулж дууслаа. Энэхүү
дархлаажуулалтад хамгийн түрүүнд зорилтод бүлэг болон өндөр настай
хүмүүс хамрагдсан. Мөн эрсдэлтэй бүлгийн хүүхдүүд болон 170 цэцэрлэгийн
хүүхдүүдийг  хамруулсан байгаа. Сайн
дурын дархлаажуулалтад алслагдсан дүүргийн иргэд болон жирэмсэн эхчүүд, багш, эмнэлгийн ажилтан, онцгой байдал, цагдаа гэх мэт төрийн
байгууллагын ажилчдыг хамруулсан. Ингээд нийслэлийн
хэмжээнд нийтдээ 108645 орчим хүн вакцинд хамрагдсан байна. Ерөнхийдөө томуугаар бага
насны хүүхэд их өвчилдөг. Тиймээс энэ жил бага насны
хүүхдүүдийг түлхүү хамруулсан. Өнгөрсөн жил цэцэрлэгийн хүүхдүүдийн
3/1 хувийг хамруулсан бол энэ жил 3/2 хувийг хамруулж ажиллалаа. 

-Томуугийн вакцинд зуун мянга гаруй хүнийг хамруулжээ. Гэвч ханиад томуу буурахгүй байх шиг байна?

-Одоо
ханиад томуугийн улирал эхэлчихсэн байна. Өнгөрсөн долоон
хоногоос лабораторийн шинжилгээгээр А хүрээний вирус
эргэлтэд орж эхэлсэн байна. Үүний хажуугаар бусад төрлийн вирус хавсарч орж ирж байгаа учраас томуугийн өвчлөл нэмэгдэх хандлагатай байна. Бид
нарын хийж байгаа вакцин А, В хүрээнийх. Энэ вакцин H1N1
H3N2 гэсэн вирусын эсрэг хийгдэж байгаа. Харин өөр төрлийн вирусын гаралтай ханиад байвал энэ вакцин нөлөөлөхгүй. Тухайлбал, нүд, хамрын
талаас зовуураар илэрдэг  ханиад, интервирусын гаралтай
ханиад цөөнгүй байна. Вакцин
хийлгэсэн хүмүүс H1N1 H3N2 вирус илэрсэн хандалт
хийгдээгүй байна. Иргэдийн  дунд томуугийн вакцин хийлгэсэн бол ханиад
хүрэхгүй гэсэн ойлголттой байдаг. Ямар төрлийн вирус вэ гэдгээс
шалтгаална. Манайд дэлхийн эрүүл мэндийн байгууллагаас өвчлөлийн сорьц болон лабораторийн шинжилгээний
байдлыг харж байгаад тухайн улс ямар вирус илүү
давамгай эргэлтэд орж байна гэдгийг судалсны үндсэн
дээр вакцины үйлдвэрлэдэг. 

-Зорилтод бүлгүүдэд үнэ төлбөргүй хийгдэж байгаа гэх энэ вакцин ямар ханштай манайд орж ирж байгаа вэ?

-Энэ жилийн хувьд дөрвөн төрлийн вакцин
ирсэн. Солонгос улсаас ирсэн вакциныг Засгийн газар хөнгөлөлтөө
үнээр худалдаж авсан. Харин АНУ, Англи, Хятад улсаас ирсэн вакцинууд манай
улсад гэрээний дагуу үнэ төлбөргүй нийлүүлсэн. Эдгээр дөрвөн төрлийн
вакцин нь  томуугийн А, В хүрээнд үйлчилдэг.

Өнгөрсөн 2015 онд 50 гаруй тун вакцин ирж
байсан. Харин өнгөрсөн жил нэг дахин нэмэгдэж ирсэн. Энэ
жилийн хувьд 250 мянган тун вакцин ирсэн байна. Жилээс жилд вакцин хийлгэх иргэдийн тоо нэмэгдэж байгаа. Мөн иргэд
вакцины тухай ойлголттой болж байна. Ирэх жил вакцины захиалгаа ахиу
өгөх бодолтой байна.

-Ер вакцин хийлгэсний дараа дархлаа хэд
хоногийн дотор тогтдог юм бол?

-Вакцин хийлгэсний дараа 21 хоногт дархлаа тогтож эхэлдэг. Харин дархлаа тогтоогүй байгаа хугацаанд
хүнд өвдөж болно. Мөн вакцин хийлгэсний дараа өвчлөл сэдэрч болно. Иймээс
иргэд томуугийн вакцинд хамрагдахдаа заавал эмчид үзүүлэх шаардлагатай
юм.

-Томуугийн вакцин дахин хийгдэх
үү?

-Нийслэлд хуваарилагдсан вакцин
дууссан. ХӨСҮТ-д сайн дурын дархлаажуулалтын кабинет хийгдэж байгаа. Иргэд томуугийн вакцинаас
гадна бусад төрлийн томуугаас урьдчилан сэргийлэх боломжтой.
Мөн хувийн ариун цэвэр болон гарын ариун цэврийг сайн сахих хэрэгтэй.
Олон хүн цугларсан газарт бага насны хүүхдийг дагуулж явахгүй байх хэрэгтэй. Дулаан хувцаслаж, амин дэмээр баялаг хоол хүнсийг хэрэглэх
хэрэгтэй юм.

Н.Алтанцэцэг