“Marvel”-ийн супер баатрын тухай өгүүлэх “Black Panther” киноны дэлхийн дахинаа кино театруудаас олсон орлого нэг тэрбум ам.долларт хүрчээ. Энэ нь Диснейн “Marvel Universe” студийн тав дахь кино юм. Дэлхий дээрх хамгийн өндөр түвшний дэвшилтэт технологи хөгжсөн Африкийн зохиомол үндэстэн Вакандагийн хууль журам сахиулагчийн дүрд жүжигчин Чадвик Боузман тоглосон билээ.
Түүнчлэн киноны гол дүрүүдэд Оскарын шагналт жүжигчин Лупита Нёонг’о, Майкл Б.Жордан болон Тагнуулан төв газрын мөрдөгч Эверетт Россын дүрд “The Hobbit” киноны од Мартин Фрийман тогложээ. Кино дэлгэцнээ гарсан 26 дахь өдөртөө тасалбарын борлуулалтаас нэг тэрбум доллар олсон аж. IMDB сайтын мэдээлснээр Box Office-ийн түүхэнд орлого нь тэрбум доллараас давсан 32 кино байдаг аж. Үүнд 2012 онд гарсан Жеймс Бонд цувралын “Skyfall”, 2017 онд гарсан “Beauty and the Beast” болон хүүхдийн “Frozen” кинонууд нэг тэрбумаас дээш орлого олж байжээ.
