Онолын физикийн салбарын өнөө цагийн дэлхийн суут эрдэмтэн, “Цаг хугацааны товч түүх” их тэсрэлтийн онол бүхий бүтээлээрээ хүн төрөлхтний түүхэнд балрашгүй хувь нэмрээ оруулсан Стивен Хокинг 77 насандаа нас баржээ. Тэрээр өнөө өглөө Кэмбриж хот дахь гэртээ амьсгал хураасан тухай гэр бүлийнхэн нь Их Британы “The Guardian” сайтад мэдэгдсэн байна. Стивен Хокинг 1963 онд буюу 21 насандаа төв мэдрэлийн саа өвчин тусч, эмч нар түүнийг 2 жилээс хэтрэхгүй амиа алдах аюултайг сэрэмжлүүлж байсан ажээ. Гэсэн ч тэрээр компьютерийн тусламжтайгаар бусадтай харьцаж, Кэмбрижийн их сургуульд амжилттай суралцаж төгссөн байна. Үүнээс өмнө Стивен Хокинг Оксфордын их сургуулийг дүүргэсэн бөгөөд хожим нь тэрээр Альберт Эйнштейний нэрэмжит шагнал болон бусад нөлөө бүхий шагналуудаар шагнагдсан түүхтэй.
Орчлон ертөнцийн талаар бид хэрхэн төсөөлдөг вэ? Яагаад дэлхий ертөнц оршин байдаг вэ? Манай нарны аймаг хэзээ үүссэн бэ? Бурхан байдаг уу? Галактик хоорондын аялал бололцоотой юу? гэхчлэн хүн төрөлхтний хувьд мөнхийн гэгдэж байсан асуултуудад Стивен Хокинг шинжлэх ухааны үндэслэлийг гаргаснаараа дэлхийн шинжлэх ухааны түүхнээ мөнхрөн үлдсэн агуу эрдэмтэн билээ.
