УИХ-ын гишүүн Л.Гантөмөр цаг үеийн асуудлаар өнөөдөр /2026.09.07/ сэтгүүлчдийн асуултад хариулт өглөө.
Тэрбээр энэ үеэр “Үнэндээ нэг үгээр хариулах боломжгүй. Маш олон асуудлыг Засгийн газар хөндөж байна. Асуудлуудаа шийдэх эр зориг алга байна гэж дүгнэхээр байна. Хамгийн том асуудал бол үнийн өсөлт. Өдрөөс өдөрт бараа бүтээгдэхүүний үнэ өсөж байна. Энэ өсөлтөд тэтгэвэр авагчид, оюутнууд, жирийн иргэд өртөж байна. Үнийн өсөлтийг хэрхэн зогсоох төлөвлөгөө алга байна.
Үнийн өсөлтийг зогсоох, төгрөгийн ханшийг чангатгах бодлогыг нийгэм хүлээж байгаа. Эхлээд үнэ бууруулах хөтөлбөр байх хэрэгтэй. Дараа нь тэтгэврийн асуудлыг шийдвэрлэх ёстой. Үүний дараа цалин яригдана.
Үнийн өсөлтийг зогсоохын тулд ямар арга хэмжээ авах вэ гэдгийг зарлахгүйгээр “үнэ өндөр байгаа учраас төгрөг хэвлээд нийлүүлье” гэдэг зүйл рүү л алхаж байна.
Хамгийн эмзэг зүйл нь Баялгийн сандаа гар дүрэх гэж байна. Ирээдүйн өв сан руугаа довтолж байна. Өөрөөр хэлбэл, баялгийн үнэ буурсан үед яаж амьдрах вэ гэдэг тооцоолол дээр л Баялгийн сангийн хууль явж байгаа. Алт, зэс, нүүрсний үнэ өндөр байгаа үед орлого сайтай байдаг. Энэ үнэ унахаар бидний орлого мууддаг. Бид нөөцгүй болно. Хуримтлалгүй болно. Ирээдүйд зарцуулах хөрөнгөгүй болно. Баялгийн сангийн хууль нь үндсэндээ Монгол Улсын эдийн засгийн тусгаар тогтнолыг хамгаалж байгаа агуулгатай хууль. Учир нь манай улс баялгаас хэт хамааралтай. Өөр экспортолж байгаа зүйл алга. Юм үнэтэй байна гээд эндээс орж ирж байгаа бүх мөнгийг идье гэвэл маргааш орж ирэхээ болиход бид хоёр, гурав дахин том цохилт авч хоосорно. Ашгийн 30 хувийг төсөвтөө авч болно. Бидний санаа зовж байгаа хамгийн гол зүйл бол Баялгийн сандаа гар дүрч байгаа явдал юм. Баялгийн санд төвлөрч буй мөнгийг учир замбараагүй өнөөдрийн хэрэглээ рүү цутгах юм бол цалин хүрэхээ болино.
Төрийн албыг цомхотгох ёстой. Гэтэл эсрэгээрээ төрийн албан хаагчдын цалинг нэмээд, бусдыг нь үл хайхарч байна. “Ард түмэн бидэнд хамаагүй” гэдэг хандлага гаргаж байна. Жирийн ажил хийж байгаа иргэд энэ үнийн өсөлтийг хэрхэн давж гарах юм бэ? Үүнд Засгийн газар хариулт өгөх ёстой.
Хамгийн гол зүйл бол үндэсний аюулгүй байдал, эдийн засгийн тусгаар тогтнол гэдэг зүйл аюулд орж байна. Бодитоор Засгийн газраас хүлээж байгаа зүйл бол нэгдүгээрт, үнийн өсөлтийг зогсоох бодлого. Хоёрдугаарт, түгжрэлийн мөнгийг яагаад зарцуулахгүй байна вэ, яагаад түгжрэлийг шийдвэрлэх бодлого, төслийг хэрэгжүүлэхгүй байна вэ гэдгийг асуумаар байна. Бид Засгийн газарт хариуцлага тооцох асуудлыг хаврын чуулган дээр шийдсэн. Энэ хүмүүсээр урт удаан ажил хийлгэх юм бол Монгол Улс аюултай байдалд орох юм байна” гэв.
