“Экс” Ерөнхий сайд Ч.Сайханбилэг 2016 оны УИХ-ын сонгуульд ялагдсанаасаа хойш нам гүм байх болсон. Таван тэрбумаар “Асем Вилла”-д хаус худалдаж авсан тухай мэдээлэл сонгуулийн дараахан өвсөнд авалзсан түймэр аятай тарсан ч, тун хурдан нам жим болсон.
Харин энэ хооронд мисс, загвар өмсөгч гэргийнх нь бизнес сайд асан нөхрөөсөө илүү олны дунд яригдах болжээ. Мисс О.Байгал Америкт нөхрөө даган амьдарч байхдаа “маникюр, педикюр” сурч, эх орондоо 2004 оны УИХ-ын сонгуулийн өмнөхөн ирэхдээ “Байгал” гоо сайхны салон ажиллуулан бизнесийн гараагаа эхлүүлсэн гэдэг. “Байгал” гоо сайхны салоны нүүр царайгаар найзууд болох топ модел Э.Одгэрэл, Ч.Туяацэцэг нар ажиллаж тун хурдан хугацаанд дээдсийн хүрээнийхний дунд моод болжээ.
Гэхдээ түүнд гоо сайхны салон хангалттай санагдсангүй. Эр нөхрөө Ерөнхий сайдаар ажиллаж байх үед баячуудын хороолол гэгддэг Зайсанд “Baigal” rewelry нэртэй үнэт эдлэлийн дэлгүүрээ нээн ажиллуулах болсон юм. Өөрөө загварыг нь гарган, бэлтэй хатагтай нарыг гоёх болсон “Өлзий”, “Тоонот гэр”, “Хатан”, “Төвөргөө” зэрэг үнэт эдлэл, гоёл чимэглэлийн цуглуулга нь одоо нэгэнтээ дээдсийн хүрээллийн бүсгүйчүүдийн гангарах дуртай эдлэл болж чаджээ. “Baigal” брэнд одоо Shangrilla-Mall-д салбараа нээснээс гадна Италийн алдарт “Valentino” брэндийн Монгол улс дахь албан ёсны төлөөлөгчөөр сонгогдож, 2017 оны дөрөвдүгээр сард нээлтээ хийсэн юм.
Нээлтийн арга хэмжээнд О.Байгалийн урилгаар Dior брэндийн Монгол дахь салбарын захирал Ц.Батчулуун, Наран трейд ХХК-ийн гүйцэтгэх захирал О.Удвал, “Таван Богд” группын ТУЗ-ын гишүүн Д.Хулан, “Төгөлдөр” сангийн тэргүүн Х.Отгонтуяа, “Сарнайх” ХХК-ийн захирал Ү.Сарнай, “Орчлон” сургуулийн ерөнхий захирал Д.Батмөнх, “Louis Vuitton” брэндийн Монгол дахь салбарын захирал Б.Дэлгэрмаа, топ модель Э.Одгэрэл, Ч.Туяацэцэг, Мисс Ч.Мичидмаа, Г.Оюунгэрэл, Бюро 24/7-гийн захирал Ө.Содгэрэл, “Ажигана” ХХК-ийн захирал Э.Туул, “МАК” ХХК-ийн ерөнхийлөгч Н.Цэлмүүн, “Улаанбаатар” Их Дэлгүүрийн гүйцэтгэх захирал Э.Мөнгөнцэцэг тэргүүтэй монголын топ хөрөнгөлөг бүсгүйчүүд ирсэн байдаг.
Эндээс харахад О.Байгал хатагтай дээдсийн зиндааны бүсгүйчүүдээ өөрийн бизнесийн гол түнш болгожээ. Түүний “Өлзий” цуглуулгаар Олимпийн мөнгөн медалт Д.Сумъяа нэлээн олон арга хэмжээн дээр гоёж харагдсан.
“Baigal” брэнд нь 18 каратын ягаан алтаас эхлээд 925 сорьцийн мөнгөн эдлэлээр цуглуулгаа бүтээж 15 сая хүртэлх төгрөгөөр үнэт эдлэлээ худалдаалдаг байна.
Эх сурвалж: breakingnews.mn
