Энэтхэгийн парламентийн гишүүн, НҮБ-ын дипломатч Шаши Тарурыг эхнэрийнх нь үхэлд буруутгажээ. Түүнийг 2014 онд эхнэрээ амиа хорлоход нь нөлөөлсөн гэж үзэж байгаа аж. Сунанда Пушкарын нууцлагдмал үхлийг эхэндээ амиа хорлолт хэмээн үзэж байсан ч эцэст нь цагдаагийнхан үүнийг аллага хэмээн дүгнэсэн байна.
Дели хотын цагдаа нар ноён Тарурыг эхнэрээ амиа хорлоход нь өдөөн хатгаж, зэрлэг балмад харьцаж байсан хэмээн буруутгаж байгаа аж. Харин ноён Тарур өөрийн Твиттер хуудсандаа өөрийг нь буруутгаж буй хэргийн эсрэг тууштай тэмцэхээ илэрхийлж жиргэсэн байна.
Шаши Тарур нь Энэтхэгийн сөрөг хүчний гол намаас нэр дэвшиж парламентийн гишүүн болсон бөгөөд 2010 онд Дубайд бизнес эрхэлдэг хатагтай Пушкартай гэрлэсэн юм. Харин Пушкар нь 2014 оны нэгдүгээр сарын 17-ны өдөр Дели дэх таван одтой зочид буудалд амиа алдсан байдалтай олджээ. Гэвч үхлийнх нь шалтгаан одоог хүртэл тодорхойгүй хэвээр байгаа юм.
Түүнийг нас барсных нь дараа эм хэтрүүлэн хэрэглэсэн хэмээн дүгнэлт гаргаж байжээ. Харин сүүлд дахин хийсэн шинжилгээний дүнгээр бүсгүйг хордуулж, тарилга хийсэн, мөн алганд нь гүн хазсан шинж тэмдэг байсныг онцлон тэмдэглэсэн байна. Түүний үхлээс өмнө Тарур нь Пакистаны сэтгүүлчтэй нэр холбогдсоноос үүдэн тэд Твиттерээр нэлээд маргаан дэгдээж байжээ. Гэвч дараа нь Пушкар, Тарур нар гэр бүлийн амьдралаа аз жаргалтай байгаа хэмээгээд, твиттер дэх маргаан нь хуурамч байсан хэмээн мэдэгдсэн аж.
25 жилийн турш дипломат албанд зүтгэсэн ноён Тарур нь НҮБ-ын ерөнхий нарийн бичгийн даргын албан тушаалд олон нийтийн мэдээлэл, харилцаа хариуцан ажилласан юм. 2007 онд тэрээр НҮБ-ын ерөнхий нарийн бичгийн дарга Бан Ги Мунд ялагдсаныхаа дараа НҮБ-аас халагдахаа зарлаад байсан юм.
Дараа нь 2009 онд Энэтхэгийн улс төрд хөл тавьж, 2010 онд крикетийн багийн төлөө наймаалцсан хэргээр сайдын суудлаасаа огцорсон аж. Дараа нь Хүний нөөцийн хөгжлийн төлөөх улсын сайдаар сонгогдон ажиллаж байжээ.
Б.Болормаа
