Яармагийн шинэ гүүрийн зорчих хэсгийг ирэх даваа гарагт нээж, тээврийн хэрэгслийн хөдөлгөөнийг нэвтрүүлэх юм байна.
Тус гүүр нь Туул гол дээгүүр дөрвөн эгнээ, 250 метрийн урттай бөгөөд хятадын хөнгөлөлттэй зээлийн 30 сая ам.долларын төсөвт өртөгөөр есөн сарын хугацаанд баригдаж дуусч байгаа аж. Энэхүү бүтээн байгуулалтын гүйцэтгэгчээр “Хятадын төмөр замын хоёрдугаар групп товчоо” ТӨК, зөвлөхөөр Монгол Германы хамтарсан компани ажиллаж байна.
Энэ гүүр байгалийн гамшгаас үүдэлтэй ямар нэг асуудал үүсэхгүй бол 50-60 жилийн баталгаатай ба баталгааны хувьд 100 жил байх ч бололцоо бий гэдгийг албаныхан хэлж байгаа юм. Шинэ гүүр одоо байгаа хуучин гүүрнээсээ гурав дахин их ачаалал авч хөдөлгөөнийг нэвтрүүлэх хүчин чадалтай бөгөөд шинэ гүүр ашиглалтад орсноор Яармагийн гүүрний орчмын замын түгжрэл 50-60 хувь буурна гэж үзжээ.
Мөн шинэ гүүрний доогуур 50 метрийн өргөнтэй нүхэн гарц баригдаж байгаа. Мөн 8.5 метрийн өргөнтэй, 270 метрийн урттай Д рамп гүүрний дээгүүр баригдаж байгаа болохоор замууд хоорондоо огтлолцохгүй, ямар нэг саадгүй зорчих боломжтой болох аж.
Улмаар шинэ гүүр ашиглалтад ормогц хуучин гүүрийг хааж засварлах ажлыг эхлүүлж, энэ оны арваннэгдүгээр сарын 30-ны өдөр гэхэд дуусгахаар төлөвлөжээ. Өөрөөр хэлбэл, яармагийн гүүр буюу яармагийн уулзвар орчмын засвар шинэчлэлтийн ажил арваннэгдүгээр сарын 30-нд бүрэн дуусах юм байна.
