Бид шатахууны үнийн өсөлтийг гүйцэхээ байлаа. Ард түмэн битгий хэл холбогдох албаныхан, хяналтын байгууллага нь ч энэ асуудлыг дийлэхээ байсан бололтой.
Өнгөрсөн нэгдүгээр сараас эхлэн шатахууны хиймэл хомсдол үүсгэсэнтэй холбогдуулан үнийн хөөрөгдөл бий болсон. Улмаар өргөн хэрэглээний АИ92, 80 бензиний онцгой албан татварыг тэглэж, шатахууны үнийг өсгөхгүй байх шийдвэрийг Засгийн газраас гаргасан билээ. Гэвч өнөөдөр шатахууны үнэ тасралтгүй нэмэгдсээр л байна.
Шатахуун импортогч компаниуд үнээ нэмэхдээ тэмдэглэлт баяр, эсвэл амралтын өдрүүдэд нэмдэг уламжлалтай. Энэ уламжлал дахин давтагдаж баяр наадмын өмнө шатахууны үнэ нэмэгдсэн. Тухайлбал, АИ-92, АИ-80 авто бензиний үнэ дахин 30 төгрөгөөр нэмэгдэж, 1830 төгрөг болсон. “Петровис”-ийн шатахуун түгээх станц АИ-92 авто бензинээ байршлаасаа шалтгаалаад 1800-1830 төгрөгөөр зарж байгаа бол “Тэс Петролиум”, “Сод Монгол”, “Магнай трейд” зэрэг шатахуун түгээх станцууд 1800 төгрөг болгосон байгаа.
Хөдөө орон нутагт АИ-92 авто бензин 2000 төгрөгт хүрчээ. Ийнхүү шатахууны үнэ нэмэгдсэн асуудалд өнөөдөр хэн ч анхаарал тавихгүй байна. Ялангуяа төрийн болон хянах үүрэг чиглэлтэй нэг ч байгууллага үг дуугарсангүй, тайлбар ч тавьсангүй.
Монголын шатахуун хэрэглэгчдийн холбоо 2018 зургадугаар сарын 28-нд олон нийтийн хэвлэл мэдээллийн хэрэгслээр “Магнай трейд”, “М-Ойл”, “Зам зуур” зэрэг компаниудыг хуурамч шатахуун зардаг гэдгийг зарласан. Гэвч энэ асуудалд бас хэн ч анхаарал тавиагүй, хэсэг хэвлэлээр шуугиж байгаад намжив. Гэтэл хуурамч шатахуун худалдаалдаг гэх компаниуд шатахууныхаа үнийг нэмсээр байна.
Үнийн өсөлт болон хуурамч шатахууны асуудалд хэн хяналт тавих юм бэ? Хяналт шалгалт хийдэг байгууллагууд нь анхаарлаа тавих цаг болсон юм биш үү. Тэр дундаа иргэд, хэрэглэгчдийн эрх ашгийг хамгаалдаг гэх тодотголтой ШӨХТГ яагаад дуугарахгүй байгаа юм бол?
ШӨХТГ шатахууны үнэ нэмэгдэх сургаар хяналт шалгалт хийж, “Шатахууны хомсдол, хэрэглэгчдийг хохироож буй үйлдлээ зогсоо” гэж мэдэгдэл хүргүүлдэг сэн. Харин тэд энэ удаад яагаад ажлаа хийхгүй байна вэ?
Наадмын баяр цэнгэлээ хөөж дуусаагүй юу? Эсвэл найрааны хавханд орчихоо юу? Шатахууны үнэ нэмэгдээд байна. ШӨХТГ хяналтаа тавиач ээ.
