Нийслэлийн Сүхбаатар дүүргийн хэд хэдэн хорооны айл өрхүүд өнгөрсөн долоон хоногт үргэлжлэн орсон борооны улмаас үерийн усанд автжээ. Тухайлбал, XX, XVIII, IX хороонуудын айл өрхүүд үерт автсан байна. Сүхбаатар дүүргийн Засаг дарга болон ажлын хэсгийнхэн үерийн усанд автсан хороонуудын нутаг дэвсгэрт очиж нөхцөл байдалтай танилцлаа.
Сүхбаатар дүүргийн хэмжээнд зөвшөөрөлгүйгээр үерийн далан дээр 255 айл өрх буужээ
Хамгийн түрүүлж Сүхбаатар дүүргийн XX, XVIII хороон дээр очсон юм. Энэ хоёр хороо зуслангийн бүсэд хамрагддаг. Тус хороонд оршин сууж байгаа зарим иргэд үерийн далан дээр буусан байдалтай байна. Иймээс үерийн ус урсах гольдролыг өөрчилснөөс болж үерийн ус хальж, айл өрхүүд усанд автаад байгаа гэдгийг Сүхбаатар дүүргийн XX хорооны Засаг дарга хэлж байсан юм. Сүхбаатар дүүргийн хэмжээнд зөвшөөрөлгүйгээр үерийн далан дээр буусан 255 айл өрх байгаа гэнэ. Эдгээр өрхүүдэд үерийн даланг чөлөөлөх мэдэгдэл хуудсыг хүргүүлжээ.
Сүхбаатар дүүргийн Засаг дарга Х.Болормаагаас дараах зүйлийг тодрууллаа.
-Танай дүүргийн хувьд өнгөрсөн хавар бас шар усны үерт автсан. Мөн өнгөрсөн долоон хоногт орсон бороонд хэд хэдэн хороо үерийн усанд автсан байна. Танайхаас ямар арга хэмжээ авч ажиллаж байна вэ?
-Дүүргийн онцгой комисс өндөржүүлсэн бэлэн байдалтай ажиллаж байна. Үерийн усыг соруулах, нэмж суваг шуудуу татах, хуучныг сэргээн засах зэрэг шаардлагатай бүхий арга хэмжээг авч хэрэгжүүлж байна. Сүхбаатар дүүргийн XX болон XVIII хороонд оршин сууж байгаа айл өрхүүд дахин төлөвлөлтөд ороогүй. Энд амьдарч байгаа айл өрхүүд маш олон жил амьдарч байгаа. Иймээс бид чанартай үерийн далан хийх хэрэгтэй байна. Тэгэхгүй бол ахиад бороо ороод халиад айл өрхүүд усанд автах учраас маш сайн тооцоо судалгаа хийж байж, ирэх жилийн төсөвтөө суулгаж, ажил хэрэг болгоно. Зөвхөн өнөө маргаашаа бодсон зүйлийг ерөөсөө хийж болохгүй.
-Өнгөрсөн хаврын шар усны үерт хэчнээн төгрөг зарцуулсан бэ?
-Өнгөрсөн хаврын шар усны үерийн үеэр авч хэрэгжүүлсэн арга хэмжээ, тохижилтын ажлуудад нийтдээ Засаг даргын нөөц хөрөнгөнөөс 40 орчим сая төгрөг зарцуулсан. Мөн бид 2015 оноос үерийн эрсдэл бүхий 12, 13, 17, 18 хороодод үерээс хамгаалах далан суваг, шуудуу, ус зайлуулах хоолой зэрэг бүтээн байгуулалтын ажлуудыг хийсэн. Үр дүнд нь энэ удаагийн хүчтэй аадар борооны үеэр эрсдэлтэй айл өрх, гудамжны тоо багассан. Үүнийг иргэд маань ч хэлж байна. Тодруулбал энэ удаа 17 дугаар хороонд эрсдэл үүссэнгүй.
-Үерийн далан дээр зөвшөөрөлгүй 255 айл өрхүүд буусан байгаа гэж байна. Эдгээр айлуудад дүүргээс ямар шаардлага тавьж байгаа вэ. Олон жил суурьшсан хашаа байшин барьчихсан байгаа учраас нүүлгэх боломж байгаа юу?
-Маш асуудалтай байна. Зөвшөөрөлгүй 255 айл, зөвшөөрөлтэй 405 айл өрхүүд байгаа. Зөвшөөрөлгүй байгаа айл өрхүүд өөрсдийнхөө хөрөнгөөр хашаа байшин барьчихсан байна. Үүнийг буулгах гэхээр бас асуудалтай. Манай иргэд иргэний үүргээ биелүүлдэггүй. Тиймээс айл өрхүүддээ үерийн аюулаас сэрэмжлүүлэх, сэргийлэх, нүүлгэн шилжүүлэх чиглэлээр сургалт сурталчилгаа, мэдээлэл зөвлөгөөг тогтмол хүргүүлэн ажиллаж байна. Манай ажлын хэсгээс үерийн далан дээр зөвшөөрөлгүй буусан 255 айлдаа мэдэгдэх хуудас хүргүүлсэн. Ирэх сарын 15-ны дотор уулзалт хэлэлцүүлэг зохион байгуулна.
-Үерийн даланг чөлөөлж хашаа татчих юм бол зөвшөөрлийг олгох уу?
– Энэ асуудлыг хуулийн дагуу судалж үзэж байж шийднэ. Одоо шууд зөвшөөрөл өгөх боломжгүй.
-Өнгөрсөн долоон хоногт орсон хүчтэй бороонд хэчнээн айл үерт автсан бэ?
-Энэ сарын 14-23-ны хооронд нэлээд их бороо орсон. Нийтдээ 85 орчим дуудлага ирсэн байгаа. Энэхүү дуудлагын дагуу дүүргийн удирдлага газар дээр нь ажиллаж, Онцгой байдлын хэлтсийн аврагчид, хороодын ажлын алба бүхий л шаардлагатай арга хэмжээг авч тухай бүр нь аюулгүй болгож ажилласан. Мөн нийслэлийн Онцгой комисст мэдэгдэж Ус сувгийн удирдах газраас 5 машиныг нэмэлтээр ажиллуулж, үерт өртсөн гудамжууд, хашааны усыг соруулсан.
Сүхбаатар дүүргийн IX хорооны 37 айлын хашаа үерийн усаар дүүрчээ
XX, XVIII хорооны дараа IX хорооны нутагт очсон юм. Энэ хорооны Ногоон нуур орчимд байгаа айл өрхүүдийн хашааны ихэнх нь усанд автсан байдалтай байлаа. Усыг соруулсан ч багасахгүй, дороосоо дахин гарч ирээд байгаа юм байна. Иймээс гудамжаа сэтэлж, усыг урсгах арга хэмжээ авахаас өөр арга байхгүй байна гэдгийг иргэд хэлж байна. Энэ хорооны хувьд 2012-2016 онд дахин төлөвлөлтөд орсон. Гэвч иргэдтэй үнэ мөнгөн дээр тохирохгүй байгаа учраас газар чөлөөлөлт хийгдээгүй. Мөн дахин төлөвлөлт хийхээр иргэдийн хаашаа байшинг авсан компаниуд ажлаа эхлүүлэхгүй өнөөдрийг хүрч байгаа гэдгийг ч иргэд хэлж байлаа. Одоогийн байдлаар IX хороонд 37 айлын хашаа усаар дүүрсэн байдалтай байгаа бөгөөд дүүргээс усыг соруулах арга хэмжээ авчээ.
Сүхбаатар дүүргийн Засаг дарга Х.Болормаа “IX хорооны хэсэг Ногоон нуурын орчимд айл өрхүүд усанд автсан. Энэ байршил нь 2012-2016 онд дахин төлөвлөлтөд хамрагдсан ч одоо хүртэл дахин төлөвлөлтийн ажил хийгдэхгүй айл өрхүүд нь усанд автсан байдалтай байна. Мөн хогийн цэг үүсээд байна. Газрыг нь авсан компаниуд ажлаа эхлэхгүй байгаа. Дүүргийн хувьд энэ асуудлыг шийдэхэд үнэхээр хүнд. Тиймээс бид дээрх асуудлуудыг шийдэхийн тулд нийслэлийн удирдлага, онцгой комисс болон дүүргээс сонгогдсон УИХ-ын гишүүд зэрэг бүхий л шатанд хамтран ажиллах саналаа уламжлаад байна.
Хашааны усыг 20 тонны машинаар 10 удаа, зургаан тонны машинаар 12 удаа соруулсан
Сүхбаатар дүүргийн IX хорооны иргэн Б.Налжирмаатай уулзлаа.
-Танай хашаа усанд автсан уу?
-Манайх есдүгээр хороонд айлын хашаа түрээсэлж амьдардаг. Энэ хашаанд өнгөрсөн тавдугаар сард ирж буусан. Гэтэл өнгөрсөн долоон хоногт хүчтэй бороо орж гэр усанд автсан. Нэг дэх өдөр гэрээ арай гэж нүүлгэж өөр айлын хашаанд барьсан. Манай хашаанд байгаа ус одоо хүртэл байж л байгаа.
-Усыг нь соруулах арга хэмжээ аваагүй юм уу?
-Хашааны усыг 20 тонны машинаар 10 удаа, зургаан тонны машинаар 12 удаа соруулсан. Өөрийнхөө хувийн мөнгөөр бас соруулсан. Гэтэл энэ ус өвдөг татсан хэвээр байна. Соруулж байгаа хэрнээ хөрснөөс гараад болохгүй байна. Манай эргэн тойрны айлууд бүгд усанд автсан байгаа.
-Та онцгой байдлын албанд дуудлага өгсөн юм уу?
-Дуудлага өгсөн. Онцгой байдлынхан ирээд ус зайлуулах боломжгүй юм байна гэдгийг хэлсэн. Манай хороонд дахин төлөвлөлт хийгдэх ёстой боловч өнөөдрийг хүртэл хийгдэхгүй байна. Дахин төлөвлөлтийг хийхээр ирж байгаа компанитайгаа үнэ мөнгөн дээр тохиролцохгүй байгаа. Одоо ахиад бороо орох юм бол манай иргэд улам хүндрэлтэй байдалд орно.
