Улаанбаатарт газардаад байсан Туркийн тусгай үүргийн CT4010 онгоц 21:25 цагт Чингис хаан нисэх буудлаас хөөрлөө. Харин Вейсел Акчайг Цагдаагийн Ерөнхий газарт хүргэсэн бололтой. Учир нь нөхцөл байдалтай холбоотойгоор цагдаагийн байгууллага хэрэг бүртгэлийн хэрэг нээж шалгаж байгаа гэж Цагдаагийн ерөнхий газраас мэдээллээ.
Тодруулбал, Сүхбаатар дүүрэг дэх цагдаагийн I хэлтсийн жижүүрт ирүүлсэн “2018 оны 07 дугаар сарын 27-ны өдрийн 09.51 цагт Сүхбаатар дүүргийн 2 дугаар хорооны нутаг дэвсгэрээс Бүгд Найрамдах Турк Улсын иргэн Акчая Виселийг үл таних хүмүүс мөнгөлөг өнгийн, Toyota Alphard маркийн автомашинд суулган хүчээр авч явсан гэх” гомдол мэдээллийн дагуу Эрүүгийн цагдаагийн албаны Зохион байгуулалттай гэмт хэрэгтэй тэмцэх хэлтсээс Эрүүгийн хуулийн 13.2 дугаар зүйлийн 1 дэх хэсэгт заасны дагуу хэрэг бүртгэлтийн хэрэг нээж, мөрдөн шалгах ажиллагааг Нийслэлийн прокурорын газрын хяналт дор явуулж байна.
Онгоц хөөрөхөөс өмнө буюу 19 цагийн үед Вейсел Акчайн гэр бүлийн өмгөөлөгч Б.Баатарсайхан сэтгүүлчдэд мэдээлэл өгсөн юм. Тэрээр “Энэ онгоц ямар зорилгоор ирснийг хууль хяналтын хариуцсан байгууллагууд нь тогтоож, ар гэрийнхнийх нь хардлагыг нэг мөр болгох үүрэгтэй гэж үзэж байна. Өмгөөлөгчийн хувьд хил хамгаалах байгууллагуудад болон Хууль зүйн яаманд гомдлоо гаргаад байна. Өнөөдөр үл мэдэдэгдэх шалтгаанаар Турк улсын иргэнийг хулгайлж буй явдлыг цагдаагийн байгууллага шалгаж, Прокурорын байгууллага хяналт тавьж байна. Онгоц ирээд, буцаж нисэх гэж байгаа нь иргэн хүн төдийгүй ар гэрийнхэнд нь хардлага төрүүлж байна. Иймд Монгол Улс ямар нэгэн байдлаар албан ёсны хариу өгөх ёстой. Энэ хүн Турк Улсын иргэн. Монгол Улсын хуульд заасан эрүүгийн гэмт хэрэгт огт шалгагдаж байгаагүй. Монгол Улсад хуулийн дагуу оршин сууж байгаа” гэсэн юм.
“Эрүүгийн хуулийн 13.2 дугаар зүйл. Хүн хулгайлах
1.Хохирогчид хүч хэрэглэж, хүч хэрэглэхээр заналхийлж, хууран мэхэлж, эсхүл сэтгэцийн өвчтэй, согтуурсан, мансуурсан, сэтгэцийн үйл ажиллагаа нь түр сарнисан, бусад өвчний улмаас биеэ хамгаалах, эсэргүүцэл үзүүлэх чадваргүй байдлыг ашиглаж эрхшээлдээ оруулан авч явсан бол нэг жилээс таван жил хүртэл хугацаагаар хорих ял шийтгэнэ.” гэсэн заалтын дагуу шалгаж эхэлжээ.
