МАН-ын дэргэдэх “Нийгмийн Ардчилал” Монголын Оюутны Холбооны /НАМОХ/ ээлжит VII Их хурал энэ сарын 17-ны өдөр зохион байгуулагдаж, хурлаар НАМОХ-ын ерөнхийлөгч болон 121 Бага хурлын гишүүн, Хяналтын зөвлөлийн есөн гишүүнийг сонголоо. Холбооны ерөнхийлөгчөөр өмнө нь УИХ-ын гишүүн асан Д.Гантулга ажиллаж байсан бол энэ удаад Ганзориг овогтой Батдорж нийт гишүүдийн 96.6 хувийн саналаар сонгогджээ.
Г.Батдорж нь 2010 онд тухайн үеийн “Монголын Ардчилсан Социалист Оюутны Холбоо”-нд элсэн, нарийн бичгийн дарга, зөвлөх зэрэг сонгуульт ажлуудыг найман жил тасралтгүй хашиж ирсэн анхдагч гишүүдийн нэг бөгөөд оюутан залуучуудын хөгжлийн төлөөх олон ажлуудыг хийсээр ирсэн аж. Тэрээр Засгийн газрын хэрэгжүүлэгч агентлаг ГБХЗХГ-ын Залуучуудын хэлтсийн даргаар ажиллаж байх хугацаандаа “Залуучуудын хөгжлийн тухай” хуулийн ажлын хэсгийн гишүүнээр ажиллаж, Монгол улс анх удаа Залуучуудын тухай бие даасан хуультай болоход тодорхой үүрэг гүйцэтгэжээ. НАМОХ нь оюутнуудыг нийтийн тээврээр үнэгүй зорчих үнэмлэхтэй болгох, “Боловсролын зээлийн сан”, “Залуучуудын хөгжлийг дэмжих” хууль, залуучууд төр захиргааны байгууллагатай болоход анхаарч иржээ. Мөн холбооны дэргэд хөдөлмөрийн бирж байгуулсан байна.
Ганзориг овогтой Батдорж нь 1988 онд Улаанбаатар хотод төрсөн. Тэрбээр:
2010 онд Монголын Ардчилсан Социалист Оюутны Холбооны Нарийн бичгийн дарга
2011 онд Монгол Ардын Намын дэргэдэх Сургалт судалгааны Стратеги академийн сургалт хариуцсан Эрдэм шинжилгээний ажилтан
2013 онд Нийгмийн Ардчиллын Академийн Гүйцэтгэх захирал
2015 онд “Нийгмийн Ардчилал” МОХ-ны Ерөнхий нарийн бичгийн дарга
2016 оноос МУ-ын Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газрын Залуучуудын хөгжлийн газрын даргаар ажиллаж байв.
НАМОХ-ны ээлжит хуралд 21 аймаг, нийслэлийн есөн дүүрэг, их дээд сургууль, коллеж, мэргэжлийн сургалт үйлдвэрлэлийн төвийн 701 оюутан төлөөлөгчөөр оролцлоо.
