БНХАУ-аас Швед улсад суугаа ЭСЯ-аас Шведийн цагдаа нар Хятад жуулчдыг зодсон хэргийн талаар энэ сарын 15-нд мэдэгдэл хийгээд байгаа талаар cri.cn мэдээллээ. Тус мэдэгдэлд Шведийн цагдаагийн үйлдлийг хатуу шүүмжлэн, энэ нь Хятад иргэдийн амь нас, аюулгүй байдалд заналхийлж, хүний эрхийг ноцтой зөрчсөн хэмээн үзэж, Шведийн засгийн газарт энэ хэргийг даруй шалгаж, Хятад иргэний гомдлын дагуу уучлал гуйж, хариуцлага хүлээлгэж, нөхөн төлбөр олгох хүсэлтийг хангахыг шаардсан байна.
Хэргийн тухайд, 2018 оны есдүгээр сарын 2-нд Хятад улсын иргэн Зэн ээж, аавын хамт Стокгольм хотын нэгэн зочид буудалд буудаллах гэтэл урьдчилж захиалсан өрөө нь өдрийн цагаар бэлэн болохоор байжээ. Бэлэн болтол нь 60 гарсан настай эцэг эхээ ядраахгүй гэсэндээ тэрээр мөнгө төлж зочид буудлын сандал дээр амрах санал тавьсан ч үүнийг нь зөвшөөрөөгүйн улмаас маргаан үүсч цагдаа дуудсан байна. Цагдаа нар Зэн болон түүний эцэг эхэд маш бүдүүлэг хандаж, буудлаас чирч гарган, Стокгольм хотоос хэдэн арван километрийн зайд орших оршуулгын газарт аваачиж орхижээ. Зэн шөнө дөлөөр замын хүмүүсийн тусламжтай хотод очиж БНХАУ-аас Швед улсад суугаа ЭСЯ-нд хандсан аж. Үүний дараа БНХАУ-аас Швед улсад суугаа ЭСЯ, БНХАУ-ын ГХЯ Стокгольм болон Бээжин хотоос Шведийн засгийн газарт эсэргүүцэл илэрхийлсэн ч Шведийн засгийн газар өнөөг хүртэл Хятадын талд хариу өгөөгүй, Шведийн хэвлэл мэдээллийн байгууллагууд ч энэ асуудлаар өнөөг хүртэл дуугараагүй байна.
Энэ асуудал нь цагдаагийн буруутай үйлдэл үү, Шведийн хүний эрхийн асуудал ноцтой хэмжээнд хүрчихээд байгаагийн илрэл үү, эсвэл зүгээр л арьс өнгөөр ялгаварлан гадуурхах үзэл үү гэдгийг тодорхойлохдоо Шведийн засгийн газар ямар хариу өгөхөөс хамаарна хэмээн хүлээж байгаа юм байна.
