Өчигдөр УИХ-ын гишүүн, Төрийн байгуулалтын байнгын хорооны дарга Д.Лүндээжанцан ОХУ-ын Холбооны хурлын Холбооны зөвлөлийн Үндсэн хуулийн эрх зүй, төрийн байгуулалтын хорооны дарга Андрей Александрович Клишас тэргүүтэй төлөөлөгчийг хүлээн авч уулзсан байна. Уулзалтын эхэнд ТББХ-ны дарга Д.Лүндээжанцан хоёр улсын хамтын харилцаа болон Монгол Улсын Их Хурал ОХУ-ын Төрийн Дум, Холбооны зөвлөлтэй нягт хамтын ажиллагааг хөгжүүлж ирсэнд сэтгэл ханамжтай байдгаа илэрхийллээ. Мөн тэрбээр Монгол Улсын Их Хурлын бүтэц, онцлог хийгээд ТББХ-ны ажил, зарим хуулийн талаар товч мэдээлэл өгөв. Хөрш хоёр улсын бүс нутаг, худалдаа, эдийн засаг, хөрөнгө оруулалтын хамтын ажиллагаа зохих түвшинд хөгжиж байгааг тэмдэглээд, Халх голын ойн арга хэмжээнд ОХУ-ын Ерөнхийлөгч Владимир Владимирович Путинийг хүрэлцэн ирнэ гэдэгт итгэж байгаагаа хэллээ.
Түүнчлэн, Монгол Улсын Ерөнхий сайд У.Хүрэлсүх ОХУ-д айлчлал хийхээр бэлтгэж буйг дуулгав.
Монгол Улсын томоохон бүтээн байгуулалтуудыг уламжлалт хөрш ОХУ-гүйгээр төсөөлөх аргагүй гэдгийг тэмдэглэхийн зэрэгцээ хоёр улсын хамтын ажиллагааны хүрээнд томоохон бүтээн байгуулалтын ажил сүүлийн жилүүдэд зогсонги байдалд орсныг дурдаж, одоо яригдаж байгаа Улаанбаатар төмөр замын текникийн шинэчлэл, эрчим хүчний салбарт хэрэгжүүлэх төсөл зэрэг асуудлыг нааштай шийдвэрлэхэд дэмжлэг үзүүлэхийг хүслээ.
Харин Оросын Холбооны Улсын Холбооны хурлын Холбооны зөвлөлийн Үндсэн хуулийн эрх зүй, төрийн байгуулалтын хорооны дарга Андрей Александрович Клишас хэлсэн үгэндээ, ОХУ-ын улс төрийн өнөөгийн байдал, бүс нутгийн сонгууль болон Үндсэн хуулийн 25 жилийн ойгоо тэмдэглэх гэж байгаа талаар мэдээлэв.
Мөн ОХУ-д иргэд цахимаар сонгуульд санал өгөх боломж бүрдсэн талаар дэлгэрэнгүй мэдээлэл өгсөн юм. Уулзалтын төгсгөлд ТББХ-ны дарга Д.Лүндээжанцан төлөөлөгчдийн айлчлалд амжилт хүсэж, Монгол Улсад тавтай зочлохыг хүсэв.
Уулзалтад Холбооны хурлын Холбооны зөвлөлийн гишүүн, Үндсэн хуулийн эрх зүй, өрийн байгуулалтын хорооны орлогч дарга Александр Богданович Карлин, Холбооны хурлын Холбооны зөвлөлийн гишүүн Ирина Валерьевна Рукавишникова нарын төлөөлөгчид байлцлаа гэж УИХ-ын Хэвлэл мэдээлэл, олон нийттэй харилцах хэлтсээс мэдээллээ.
