Өнөөдөр Монгол Улсын Ерөнхийлөгчийн төсөвт тавьсан хоригийг УИХ-ын нэгдсэн чуулганаар хэлэлцэх ёстой байлаа. Чуулган 10.00 цагт эхлэхээр тов зарласан хэдий ч ирц бүрдэхгүй байсаар өдийг хүрч байна.
Уг нь УИХ-ын дарга хурлаа удирдах, ирцээ бүрдүүлэх үүрэгтэй. Энэ эрх мэдлийг ч хуулиар олгосон байдаг. Гэвч өөрт оногдсон эрх мэдлээ хувийн эрх ашиг, явцуу бүлэглэлийг хамгаалахад ашигласан гэж УИХ-ын нэр бүхий гишүүд үзсэн учраас түүнийг өөрийн хүсэлтээр албан тушаалаасаа чөлөөлөгдөх ёстой гэж үзлээ. Үүнийгээ ч УИХ-д биечлэн танилцуулж, шаардлага биелүүлтэл хугацаагүйгээр чуулганы хуралдаанд суухгүй гэдгээ мэдэгдэв. Өөрөөр хэлбэл улс төрийн бойкот хийж, чуулганы хуралдааныг гацааж орхилоо.
Санаж байна. Хэдхэн жилийн өмнө “ирцээ бүрдүүлж чаддаггүй УИХ-ын дарга огцрох ёстой” гэж одоогийн эрх баригчид З.Энхболдыг шахдаг байлаа. Тэгвэл энэ шахалт М.Энхболдод ирэв. Хариуд нь тэрээр УИХ дахь намын бүлгийн дарга нарыг чичлэхээс өөр юу ч хийж чадсангүй.
Хурлаа удирдаж, улс орны тулгамдаж буй асуудлыг хэлэлцээд явж байх учиртай атал утсаар ярьж, чуулганы танхимын хойморт суухаас өөр ажил УИХ-ын даргад алга.
Чуулганы хуралдаан гацахгүйгээр асуудлаа шийдвэрлээд явах нь хэн хэндээ ашигтай, улс оронд ч хэрэгтэй. Гэвч гишүүдийн тавьсан, шаардсан асуудлуудыг үл тоож, өөрт хамаарал бүхий, өөрийн эрх ашиг хөндөгдсөн асуудлыг яаравчлан хэлэлцэхэд УИХ-ыг ашиглаж байгаа учраас л М.Энхболдыг огцрох нь зөв гэж УИХ-ын гишүүд үзсэн юм.
Тухайлбал, УИХ-ын гишүүн Л.Оюун-Эрдэнэ бойкот хийх болсон шалтгаанаа “Үндсэн хуулийн цэц хүртэл М.Энхболд гэдэг хүний өмнө хүчин мөхөстөж байна. Түүнээс болж улс төрийн тогтворгүй байдал үүслээ. МАНАН бүлэглэлийн сүүлчийн бөглөөс гэж би харж байгаа. Бүлэглэл нь тусдаа, төр нь тусдаа байх ёстой. М.Энхболд гэдэг нэр хүнд нь уначихсан, төрт ёсны зарчмаасаа гажчихсан байгаа хүнээр парламентыг удирдуулж явах боломжгүй гэж харж байна” гэж тайлбарлав.
Харин УИХ дахь АН-ын бүлгийн гишүүн Ж.Батзандан “60 тэрбумын хэрэг өнөөг хүртэл шийдэгдэхгүй байгаа. Нээлттэй сонсгол хийхийг шаардсан болов хийхгүй байна. Ийм УИХ-ын даргатай байхыг бид дэмжихгүй” гэлээ.
Өөрөөр хэлбэл, М.Энхболдын үйлдэл улс орныг удирдах гэхээсээ хувийн ашиг сонирхлын шинжтэй байгааг тэд хэлэв. Энэ нь цаашлаад түүнд УИХ-ыг удирдаад явах чадамж байхгүй гэдгийг харуулж байна.
