Улс төрийн галыг улаан гараараа унтраалаа

Монголчууд ардчилсан нийгэмд шилжиж, өөрсдийн хүсэл зоригоор төрийн эрх барих дээд байгууллагаа долоо дахь удаагаа сонголоо. Энэ удаа сонгогчид Монгол Ардын намд итгэл үзүүлж, парламентын суудлын дийлэнх буюу 65 мандатыг харамгүй өглөө. Сонгуулийн жил эхэлснээс хойших хагас жилийн хугацаанд эргэн буцсан, өмнөхөө үгүйсгэсэн олон шийдвэрийг эрх баригч хүчин болох Ардчилсан намын зүгээс гаргасан. Нэн ялангуяа сонгуулийн санал хураалтаас сарын өмнө Үндсэн хуулийн Цэцийн дүгнэлтэд дулдуйдан Сонгуулийн хуульд өөрчлөлт оруулсан нь эрх баригч намын ил цагаандаа гарсаныг харуулсан. Өөрөөсөө бусдыг үл тоомсорлосон \”хаан зан” нь олон сонгогчийн өөрсдөөс нь нүүр буруулахад хүргэснийг Ардчилсан намын удирдлага одоо болтол ойлгоогүй бололтой. Сонгуулийн санал хураалтын шөнө сонгогчдын сонголтыг хүндэтгэж буйгаа илэрхийлсэн Ардчилсан намын удирдлага шинэ парламентын анхдугаар чуулганыг хойшлуулах гэж өнгөрсөн хоёр өдөр оролдсон нь үүний илрэл юм. Хүн хэлэхээс нааш ухаардаггүй, цаас чичихээс нааш цоордоггүй гэж.

Ардчилсан намын эл үйлдэл нь Монголын улс төрд гал авалцаж мэдэх аюултай нөхцөл байдлын ирмэгт аваачсан. Хүн болгон өчигдөр шинэ парламентын анхдугаар чуулган болох нь уу, үгүй юу хэмээн чих тавин хүлээж байсан. Энэ галыг улаан гараараа атгасан хүн бол Монгол улсын Ерөнхийлөгч Ц.Элбэгдорж байлаа. Төрийн эрх мэдлийг сонгогдсон хүчинд тайван замаар шилжүүлэх, төрийн албыг нэг хором ч тасалдуулалгүй байж чадлаа. Сонгуулийн өмнөх ид галзуурлын үеэр \”долдугаар сарын 1 давтагдах вий” гэсэн айдас болгоомжлол олон сонгогчид байсан нь нууц биш. Харин санал хураалтын шөнө ялсан нь ялалтаа тунхаглаж, ялагдсан ялагдлаа хүлээн мэдэгдсэн улс төрийн соёл энэхүү айдсыг сарниулсан. Харин сонгуулийн зөрчил, маргааныг шалгуулах, анхдугаар чуулганыг хойшлуулах улс төрийн нам, улстөрчдийн үг үйлдэл нийгмийг тогтворгүй байдал руу чирэх аюулыг дагуулсан нь үнэн. Улстөрчдийн хийрхэл ямархуу гунигт үр дагаварт хүргэдгийг бид бэлхнээ мэднэ.

Монгол улс АСЕМ хэмээх дэлхийн улс төрийн олимпийг хэдхэн хоногийн дараа нутагтаа зохион байгуулах гэж байна. Энэ нэр хүндтэй арга хэмжээг нэр төртэй, ёс журмаар нь зохион байгуулж чадах эсэхээс Монгол улсын цаашдын нэр хүнд хамаарах гэж байна. Олон орны төрийн тэргүүн, өндөр дээд албан тушаалтан Монголд нэг цаг мөч дор цуглаж, дэлхий нийтийн анхаарлыг татах гэж байна. Хоёр хөрш орон энэ арга хэмжээнд Засгийн газрын тэргүүнээ илгээхээр бараг тохирчихоод байна. Ийм нөхцөл байдалд монголчууд бид гэр доторх ажлаа аль болох богино хугацаанд төвхнүүлж, бүрэнх эрхтэй төртэй байж байх учиртай.

Түүнээс наана Монгол түмний их баяр цэнгэл болсон Наадам болох гэж байна. Монголчууд бид Наадам, Цагаан сараа хэрхэн тэмдэглэснээр тэр жилийн өнгөө шинждэг уламжлалтай. Улс төрийн хэрүүл тэмцлээ хойш тавьж, түвшин сайхан наадах нь монгол хүн бүрийн сэтгэлийн угт байдаг хүсэл. Зүлэг ногоон дэвжээн дээр дэвэх ид хавт бөхчүүд, тоосоо өргүүлэн айрагдах морьд, чивхэрсэн нумаа татах мэргэчүүдээ харж баясах цагаар улс төрийн хэрүүл тэмцэл ярих нь ядахдаа бэлгэ дэмбэрэлгүй юм даа.

А.Шарав