Э.Бат-Үүл гурав хоногийн өмнө 225 тэрбум төгрөгийн гэрээ үзэглэжээ

 

 

Явах хүнээр ачаа бүү татуул гэсэн мэргэн ардын минь үг бий. Бүрэн эрхийн хугацаа нь дуусаж байх үед нийслэлийн халаагаа өгч байгаа удирдлагууд нэгэн хачирхалтай гэмээр гэрээг үзэглэсэн талаар өчигдөр болсон НИТХ-ын анхдугаар чуулганы үеэр МАН-ын гишүүн төлөөлөгч С.Мөнхчулуун хэлж олныг алмайруулав. Тодруулбал, хотын дарга асан Э.Бат-Үүл Сонгинохайрхан дүүрэгт баригдахаар яригдаад гурван жилийн нүүр үзсэн мөнөөх НЗДТГ-ын барилгыг 225 тэрбумаар бариулна гэж Унгарчуудтай тохироод концессын гэрээ байгуулж, бүх асуудлаа шийдүүлжээ. Энэхүү мэдээллээс гарын үсэг зурах ажиллагаа өнгөрсөн даваа гаригт болж өнгөрсөн бололтой.

Хотын хуучин удирдлагууд Сонгинохайрхан дүүргийн 21 дүгээр хороолол, Ханын материалын захын баруун хойно 225 тэрбумын өртөгтэй 20 давхар барилга барихаар төлөвлөж байв. Уг нь барилгыг концессын гэрээгээр барьж, барилга барих компанийг олж, эхний ээлжийн гэрээнд талууд гарын үсэг зурлаа хэмээн мэдэгдэж байсан удаатай. Хэрвээ уншигчид санаж буй бол энэ үгийг Нийслэлийн Засаг даргын Санхүү эдийн засгийн асуудал хариуцсан орлогч Н.Батаа өнгөрсөн тавдугаар сарын 17-нд хэлж байсан юм. Тэрбээр энэ өдөр концессын гэрээ байгуулах зөвшөөрөл олгох тухай асуудлыг танилцуулж байхдаа \”Нийслэлийн концессын гэрээний жагсаалтад нийслэлийн Засаг захиргааны I байр буюу нийслэлийн Засаг даргын Тамгын газрыг спорт заалтай нь хамт буулгаж шинээр барих төсөл багтсан. Төслийг хэрэгжүүлэх зорилгоор нийслэлийн Эдийн засгийн хөгжлийн газраас Концесс олгох уралдаант шалгаруулалтыг зарлаж шалгаруулалтад \”Голомт фаннэйшнил групп” ХХК шалгарсан. Тус компани Нийслэлийн ЗДТГ-ын хуучин байрыг буулгаж өөрийн хөрөнгөөр, төмөр бетонон карказан хийцтэй зургаан давхар, нэгдсэн зоорийн нэг давхартай, нийт 17 037 м2 талбай бүхий барилга болгон барих бөгөөд 1-3 давхарыг нийслэлийн өмчид шилжүүлэх юм. Одоогийн Нийслэлийн ЗДТГ-ын байр нь анх 1947 онд ашиглалтад орсон ба 2007 онд ашиглалтын хугацаа дууссан. Нийслэлийн ИТХ-ын Тэргүүлэгчид энэ асуудлыг хэлэлцээд, Нийслэлийн Засаг даргыг \”Голомт фаннэйшнил групп” ХХК-тай концессын гэрээ байгуулахыг зөвшөөрөв” гэж байсан юм.

Түүний ярианд уг барилгын өртөг 225 тэрбум төгрөг болно. Унгар Улстай концессын гэрээ хийнэ гэсэн нэг ч үг өгүүлбэр байхгүйг анзаарч байгаа байх. Ийм мэдээлэл өмнө нь хэвлэл мэдээллийн хэрэгсэл болон хотын удирдлагуудын амнаас ч сонсогдож байгаагүй. Гэтэл төсвийг хэмнэж зөв бодлогоор ажиллана гэдэг Хотын дарга асан маань яагаад шинэхэн барилгыг 225 тэрбум төгрөгөөр барихаар Унгарын талтай гэрээ хийж баталгаажуулав аа. Өчигдөр болсон НИТХ-ын анхдугаар чуулган дээр НЗДТГ-ын барилгыг 225 тэрбумаар барихаар болж, Унгарын талтай концессын гэрээ хийгдээд батлагаажсан явааг яагаад төлөөлөгч С.Мөнхчулуун төлөөлөгч ярих болов. Тиймээс хотын дарга асан Э.Бат-Үүл үнэхээр Сонгинохайрхан дүүрэгт баригдах НЗДТГ-ын барилгыг 225 тэрбум төгрөгөөр барихаар төлөвлөж Унгарын талтай гэрээ хийсэн үү гэдэг нь олны анхаарлыг зүй ёсоор татаж байгаа юм.

НИТХ-ын анхны хуралдаан дээр энэ мэдээллийг хөндсөн төлөөлөгч шинээр томилогдсон НИТХ-ын дарга Ц.Сандуйд хандаж, энэ асуудлыг анхааралдаа авч зохих хууль хяналтын байгууллагаар шалгуулаад авахад гэмгүй шүү гэсэн үгийг давхар дайж байв. Түүгээр ч зогсохгүй өмнө нь хийгдсэн, хэрэгжсэн төсөл хөтөлбөрүүдийг ч шалгуулах ёстой гэсэн байр суурийг илэрхийлсэн юм. Хэдийгээр өнөөдөр нийслэл өнгөө засч өөр болсон ч гэлээ асар их мөнгөөр хэдхэн настай ургамал тарьж хогны ногоон уутанд зургаан тэрбум төгрөг зарцуулсан гэх шүүмжлэлүүд олонтаа гарч байсныг хэн хүнгүй л санаж байгаа. 

Сайн ажилласан гэх нэр зүүгээд байсан хотын дарга асан Э.Бат-Үүл яагаад энэ барилгад анхаарлаа хандуулж, 225 тэрбумыг цацахаар шийдсэн юм бол. Яригдаад дөрвөн жил болсон барилга шүү дээ. Үүл дарга сэтгэл тавьсан бол барилга барих ажил аль хэдийнэ эхэлчихсэн явж байгаа. Магадгүй ашиглалтанд ороод Сонгинохайрханчууд болон нийслэлчүүдийг гялайлгачихсан, дарга өөрөө сонгуульд багаараа ялалт байгуулчихсан ч байж болох. Гэвч цагтаа хийгээгүй байж, ээлжит сонгуулийн дүнгээр үүрэгт ажлаа хүлээлгэж өгөх нь тодорхой болсон үедээ яагаад яаруу түргэн шийдвэр гаргасан бэ гэсэн асуулт сонирхол татаж байгаа юм. Магадгүй, ойрын арван жилдээ бүтээх боломжгүй асуудлыг дөрвөн жилийн өмнө мөрөөдөж, түүнийгээ хэрэгжүүлж чадаагүй болохоор хотын шинэ удирдлагад том чиргүүл ч болгон үлдээсэн байж болох. Эс бол асар их мөнгөний сонирхол гүйчихэв үү. Хотын захиргааг нүүлгэн шилжүүлэхэд бид хараахан бэлэн биш байна. Ядаж л эдийн засгийн хямрал, өгч авах өр ширээ эхлээд тооцож байж дараа нь хотын барилгаа гэж дуугарах ёстой биш үү.