Япон улсын нийслэл Токио хотноо зохион байгуулагдаж буй жүдо бөхийн 2019 оны насанд хүрэгчдийн ДАШТ гурав дахь өдрөө үргэлжилнэ. Өнөөдөр манай улсаас эрэгтэйчүүдийн 73 кг-ын жинд дэлхийн аваргын хүрэл медальт МУГТ Г.Одбаяр болон ОУХМ Ц.Цогтбаатар, эмэгтэйчүүдийн 57 кг-ын жинд Л.Энх-Отгон нар хүч сорино.
Эрэгтэй 73 кг-ын жинд өрсөлдөх Г.Одбаяр гавьяат энэ онд Тбилисийн Гранприд 5-р байранд шалгарсан бол Антальягийн Гранприд шилдэг 8-д шалгарч УАШТ-д хүрэл медаль хүртсэн. Харин Ц.Цогтбаатар Ази-Номхон далайн АШТ-д түрүүлж, Парисын Их Дуулгаас мөнгөн медаль хүртэж УАШТ-д түрүүлээд байгаа билээ.
Харин эмэгтэйчүүдийн 57 кг-ын жинд өрсөлдөх Л.Энх-Отгон нь 19 настай бөгөөд анх удаагаа дэлхийн хэмжээний тэмцээнд оролцож байгаа юм.
Манай улсаас эрэгтэйчүүдийн 73 кг-ын жинд гавьяат тамирчин С.Ням-Очир 2015 онд хүрэл медаль, Г.Одбаяр 2017 онд мөн хүрэл медаль хүртэж байсан. Харин эмэгтэйчүүдийн 57 кг-ын жинд Х.Эрдэнэ-Од гавьяат 2005 онд Кайраас хүрэл, Д.Сумьяа 2017 онд алт, 2015, 2018 онуудад хүрэл медаль хүртэж байжээ.
Өчигдөр манай жүдочдоос 66 кг-ын жинд барилдсан Ё.Басхүү амжилттай барилдсан. Тэрээр тэмцээний хүрэл медалийн төлөө Молдавын Д.Вейру-тай барилдаж нэмэлт цагт иппон үнэлгээгээр ялагдсанаар тэмцээнийг өндөрлүүлсэн юм. Тэрээр дэлхийн чансаанд дээгүүр бичигддэг, дэлхийн аварга зэрэг олон бөхийг ялж шуугиан тарьсан билээ.
Өнөөдөр МУГТ Г.Одбаяр нарын гурван бөх дэлхийн дэвжээнд гарна
}
Шинэ мэдээ
