С.Билгүүн: ШШГЕГ 360 сая төгрөгөөр Лексус маркийн машин “Лотус голд майнг” ХХК-аас худалдан авсан

Хууль зүй, дотоод хэргийн яамны харьяа Шүүхийн шийдвэр гүйцэтгэх ерөнхий газар хууль бус үйл ажиллагаа явуулдаг аж ахуйн нэгжтэй худалдаа хийсэн гэх мэдээлэл сошиалд тараад байгаатай холбогдуулан тус яамны Төрийн нарийн бичгийн дарга С.Билгүүн өнөөдөр мэдээлэл хийлээ.
Тэрбээр “ШШГЕГ нь сүүлийн зургаан жилийн хугацаанд улсын төсвийн хөрөнгөөр машин худалдаж аваагүй байсан. Гэхдээ тус байгууллагын хэвийн үйл ажиллагааг үргэлжлүүлэхийн тулд тодорхой тооны машин, худалдан авсан. Тухайн үед худалдан авалт хийхдээ 1,567,400,000 сая төгрөгөөр 29 ширхэг машин худалдаж авснаас зөвхөн нэгийг нь онцолж яриад байна. Туслах үйл ажиллагаанаас олсон болон давсан орлогыг санхүүгийн дараагийн жилд нь Сангийн сайдын зөвшөөрлөөр олгодог. Энэ орлогоос тэдэн төгрөг хуваарилж өгөөч гэдэг хүсэлтийг Сангийн сайдад тавьсан.

Ингээд ШШГЕГ 360 сая төгрөгөөр лексус маркийн машиныг “Лотус голд майнг” ХХК-аас, зургаан ширхэг приус маркийн машиныг “Энхзул трэйд” компаниас, УАЗ фургон маркийн 17 машиныг “УАЗ мега” компаниас, гурван ширхэг автобус, бохир соруулах Газ маркийн 2 машин худалдан авсан.

Мөн Үндэсний баяр наадмыг зохион байгуулах хорооны Үндэсний бөхийн салбар хорооны хуралдаанаар сэргээш хэрэглэсэн бөхтэй холбоотой асуудлыг хэлэлцсэн байна.  Энэ талаар тэрбээр “Үндэсний бөхийн салбар хороо хуралдсан. Үндэсний их баяр наадамд тав буюу түүнээс дээш давсан 16 бөхөөс сэргээшийн шинжилгээ авдаг. Хоёр бөхөөс допинг илэрсэн. Хоёр бөхөд ажлын 10 хоногт багтаан В сорьцыг шинжлүүлэх хүсэлт гаргаж болно гэсэн. Нэг нь буюу Э.Оюунболд хүсэлт гаргаагүй. Тийм учраас нэрийг нь ил тод зарлах боломж бүрдсэн. Тэр дагуу намайг орон нутагт ажиллаж байх үеэр Үндэсний баяр наадмыг зохион байгуулах хорооноос нэрийг нь зарласан. Нэгэнт 10 хоногт “Б” сорьцын шинжилгээ хийлгэх хүсэлтээ гаргаагүй учраас хуулийнхаа хүрээнд нэрийг зарлах учиртай. Одоо бол дараагийн шатанд салбар хороо өөрийнхөө төвшинд шийдвэр гаргаад төв хороондоо уламжилна. Допинг хэрэглэсэн нь олон улсын итгэмжлэгдсэн хороогоор тогтоогдсон нөхцөлд барилдах эрхийг 2 жилийн хугацаагаар хасах, давсан давааг нь хүчингүй болгох, учраа таараад барилдаад унасан бөхөд нь цол чимгийг нэмж олгох, сэргээш хэрэглэсэн бөхийн цол чимгийг нь хураах саналыг Үндэсний бөхийн салбар хороо Баяр наадмыг зохион байгуулах үндэсний хороондоо хүргүүлэх учиртай. Эл саналаа ирэх долоо хоногийн даваа гаригт хүргүүлнэ” гэв.

Н.Алт