Дэд сайдын томилгоо: \”Арай ч дээ\” гэмээр хүмүүс олон байна

Тухайлбал, Боловсрол, соёл,
шинжлэх ухаан, спортын дэд сайдад УИХ-ын гишүүн асан Ё.Отгонбаярыг дэвшүүлжээ.
Тэрээр энэ удаагийн сонгуулиар нэрээ татаж өнжсөн байгаа. Гэвч нам нь түүнийг
зүгээр суулгахыг хүссэнгүй. Тиймээс дэд сайдын албан тушаалд томилохоор болж.
Ё.Отгонбаярын хувьд өмнө нь тус салбарыг удирдаж байсан арвин туршлагатай
нэгэн. Ж.Батсуурь сайдаасаа ч илүү нэгэн гэдгийг түмэн олон мэдэх биз. Тэгэхээр
сайдынхаа дутууг нөхөж, салбараа удирдаад явах чадвартай хүн учир дэмжихэд
асуудал үгүй.

Гэтэл олон жил намын
байгууллагаас хальж хэтэрч байгаагүй. Төрийн байгууллага удирдах мэдлэг
туршлага хомс Б.Цогтгэрэл гэх залууг \”Зам тээврийн салбарыг удирд” гээд л
шийдвэрлэсэн байх юм. Түүний хувьд намдаа байгуулсан гавьяатай хүн. Гэвч энэ нь
улсын чухал салбарыг шагнал болгоод өгчих гэсэн үг биш л баймаар. Сайд нь
мэргэжлийн хүн учраас дэд сайдын ямар мэргэжилтэй байх нь хамаагүй гэж үзсэн юм
болов уу даа.

Мөн дэд сайдад нэр дэвшигчид
дунд хуучны танилууд олон харагдав. Тухайлбал, Онцгой байдлын Ерөнхий газрын
даргаар ажиллаж байсан саяхан МАХН-аас гарч байгаагаа мэдэгдэж хэвлэлийн хурал
хийж ахмадуудын дургүй хүргэж, памперс шидүүлээд авсан Т.Дуламдорж Батлан
хамгаалахын дэд сайдад яригдаж байна. Цэргийн цол, зэрэг хүн мөн. Гэвч албан
тушаалын төлөө намаасаа хэзээ ч урваж мэдэх ашиг сонирхлын зөрчил харагддаг. Түүнийг
УИХ-ын гишүүн Д.Тэрбишдагвын хүн гэдэг. Тэгэхээр УИХ-ын гишүүн Д.Тэрбишдагвын
нөлөөлөл дэд сайдын томилгоонд оров уу гэж хардаж байна.

Түүнээс гадна ажлын хариуцлага
алдсан гэх үндэслэлээр \”халагдаж байсан” Л.Бямбасүрэн гэх хатагтай Эрүүл мэндийн
дэд сайдад яригдаж байна. Тэрээр Нийслэлийн мэргэжлийн хяналтын газрын даргаар
ажиллаж байсан. Энэ хугацаанд нийслэлд мэргэжлийн хяналттай холбоотой маш олон
алдаа зөрчил гарч байлаа.

\”Техникийн нөхцөл бүрдээгүй,
шаардлага хангахгүй барилгуудад эхлэх, үргэлжлүүлэх зөвшөөрөл олгодог байсан,
үүний цаана цөөнгүй хүний амь насны асуудал холбоотой…” гэгчлэнгээр эрүүгийн
хэрэг хүртэл үүсч явсан нэгэн юм. Гэтэл алдаа дутагдал ихтэй ийм хүнийг дэд
сайд, тэр тусмаа Эрүүл мэндийн салбарыг удирдуулахаар илгээх гэж байна.

Мөн хэвлэлийн хуудаснаа \”хар”
нэртэй Х.Бадамсүрэн дэд сайдад яригдаж байна. Тодруулбал, Уул уурхай хүнд
үйлдвэрийн дэд сайдад. МАН-д \”ёстой түүнээс өөр хүн олдохгүй байна уу” гэж
асуумаар. Авлига албан тушаалын хэргээр байнга л асуудал тарьж байдаг. Гишүүн
байсан гэх туршлагатай ч түүнээсээ хэтэрсэн \”хар” нэртэй хүн дээ. Мэдэхгүй юм.
Х.Бадамсүрэнг Ц.Дашдоржид хань болоод явна гэдэгт итгэхгүй л байна. Чадвар
багатай хоёр хүн салбарыг унагах вий дээ.

Мөн \”алимаа\” гэх нэрээр алдаршсан УИХ-ын гишүүн асан Ц.Батбаярын нэр  Байгаль орчин, аялал жуулчлалын дэд сайдад яригдаж байна. Авлига албан тушаалын хэргээр ял сонсож, хоригдож байгаад саяхан суллагдсан хүн шүү дээ. Гэтэл хэнэг ч үгүй сайдад томилохоор оруулж ирэх юм. Энэ бол ашиг сонирхлын маш том зөрчил шүү. Уг нь ажлын гараа нь Багахангай дүүргийн Байгаль орчны байцаагч гэж намтарт нь дурдсан байна. Гэхдээ л албан тушаалын гэмт хэрэгт холбогдож, улмаар ял шийтгүүлж байсан хүнийг дахиж төрийн удирдах албанд томилмооргүй л байгаа юм. 

Ер нь МАН-ын Удирдах зөвлөлөөс
гарсан шийдвэр иргэдэд нэг л таалагдаж өгөхгүй байх шиг. Харин УИХ дахь намын
бүлэг арай дөнгүүр шийдвэр гаргаад байна гэж дүгнэмээр. Тэгэхээр дээрх алдаа
дутагдал ихтэй хүмүүсийг томилж, намынхаа нэр хүндийг унагахгүй байлгүй гэж
МАН-ын бүлэгт найдаж байна. Уг нь МАН-д дэд сайд хийгээд явчих чадвартай, нэр
цэвэр залуус олон л харагдах юм. Даанч томилгоо хийх болохоор тэднийгээ
мартчихаад байна уу гэж хардмаар. 

• Боловсрол, соёл, шинжлэх ухаан, спортын дэд сайдад УИХ-ын гишүүн асан Ё.Отгонбаяр
• Гадаад хэргийн дэд сайдад Г.Тэнгэр 
• Зам тээврийн дэд сайдад Б.Цогтгэрэл  
• Эрчим хүчний дэд сайдад Т.Гантулга 
• Хууль зүй, дотоод хэргийн дэд сайдад Б.Энхбаяр 
• Сангийн дэд сайдад Х.Булгантуяа  
• Уул уурхай, хүнд үйлдвэрийн дэд сайдад Х.Бадамсүрэн 
• Барилга, хот байгуулалтын сайдад М.Батбаяр  
• Байгаль орчин, аялал жуулчлалын сайдад Ц.Батбаяр 
• Батлан хамгаалахын дэд сайдад Т.Дуламдорж 
• Хөдөлмөр, нийгмийн хамгааллын дэд сайдад С.Мөнгөнчимэг  
• Хүнс, хөдөө ах ахуй, хөнгөн үйлдвэрийн дэд сайдад Т.Аубакир  
• Эрүүл мэндийн дэд сайдад Л.Бямбасүрэн нарыг дэмжихээр болсон байна.