“Уудам Монгол” сургуулийн сурагчдаас хоолондоо хордсон шинж илэрчээ

Баянзүрх дүүргийн 13-р хороо, “Цэцээ гүн” сургуулийн байранд байрладаг “Уудам Монгол” ахлах сургуулийн сурагчидаас хоолны хордлогын шинж тэмдэг илэрчээ. Улмаар тэднийг Халдварт өвчин судлалын үндэсний төвд үзүүлж 14 сурагчийг тус эмнэлэгт хэвтэн эмчлүүлж, таван сурагчийг гэрээр эмчилэхээр болсон байна.
Сургуулийн хоолыг Чингэлтэй дүүргийн нутаг дэвсгэрт байрладаг ”Фаунд таун” ресторанаас нийлүүлдэг. Есдүгээр сарын 11-ний өдрийн хоолонд тахианы зутан шөл, үхрийн махан котлет олгогдож, нийт 103 сурагч, есөн багш, ажилтан хооллосон байна.
ХӨСҮТ-ийн Эрт сэрэмжлүүлэг, хариу арга хэмжээ авах нэгжийн дарга Н.Сувдмаа “Тухайн сургуулийн зургаан сурагч бөөлжих, суулгах, гэдэс базлах зэргээр хоолны хордлого байж болзошгүй шинж тэмдэгтэйгээр өчигдөр 14:00 цагийн орчимд манай төвд хандсан.
Энэ тухай шуурхай удирдлагын нэгжид мэдээлэл ирснээр журмын дагуу холбогдох удирдлагууд болон мэргэжлийн хяналтын байгууллагад мэдээлсэн. Харин 22:30 цагийн байдлаар хоолны хордлого байж болзошгүй тохиолдлоор хандсан сурагчийн тоо 22 болж нэмэгдсэн. Тэдний 17 нь хэвтэн эмчлүүлж буй бол тав нь зөвлөгөө авч, гэрээр эмчилгээ хийлгэж байгаа” гэлээ.
“Уудам Монгол” сургуулийн захирал Г.Наранбат “Манай сургууль 110 гаруй сурагчтайгаар анхны хичээлийн жилээ эхлүүлсэн. Хичээл өглөөний 08:00-17:00 цаг хүртэл үргэлжилдэг тул өдрийн хоолтой байх нь зөв гэж үзэн хүргэлтээр хоол авахаар болсон.
Хордлого авсан сурагчдын биеийн байдал хэвийн байгаа ч шинжилгээний хариу гарах хүртэл буюу 72 цагийн хугацаанд эмнэлгээс гаргах боломжгүй гэж гэх хариу өгсөн. Сургуулийн зүгээс сурагчдын биеийн байдалд тогтмол анхаарал хандуулж байгаа. Мэргэжлийн байгууллагууд ажиллан, шаардлагатай шинжилгээнүүдийг авсан тул хариу нь гарахаар албан ёсны мэдээлэл өгнө байх” гэх тайлбарыг өглөө.