Сонирхолтой “шарвалт”

УИХ маань өнөө маргаашгүй тарчхаж мэдэх байдалтай болчихоод л байна. Нэгэнтээ ажил нь урагш явахаа больчихсон юм бол тарчихсан даа ч яах вэ дээ. Гол нь тарлаа гэхэд ээлжит бус сонгуулиар хэн хэн нэр дэвших вэ гэдэг асуудал тун ярвигтай болж хувираад байна.

МАН-ын дарга У.Хүрэлсүх хулгай, луйварт нэр холбогдсон хүмүүст нэр дэвших эрх олгохгүй гэж хатуу мэдэгдсэн. Тэгэхээр ЖДҮ, Концесс, 60 тэрбумд нэр холбогдсон нөхдүүдэд нэр дэвших шаанс байхгүй гэж ойлгогдож байна. Эндээс л эрх баригч нам ирэх сонгууль хэнийг нэр дэвшүүлэх гээд байна вэ гэдэг нь эргэлзээ төрүүлж байна.

Харин энэ дуулианаар нэгэн цагт өөрт ашиггүй болсон хэмээн намаа орхиж одсон нөхдүүд одоо нам руугаа хошуурч эхэллээ. Тэдний нэг бол Ж.Сүхбаатар юм. Тэрээр МАН-ын нарийн бичгийн даргын алба хашч байсан, УИХ-ын гишүүнээр хүртэл сонгогдож явсан, ер нь намаасаа авах ёстойгоо авч, хүртэх ёстойгоо хүртэж л явсан нөхөр. Гэтэл нэг өдөр нам нь түүнд ашиггүй болж хувирсан байдаг. Тиймээс намаас орхиж, МАХН-д буюу Н.Энхбаярт дагаар орж байсныг санаж байгаа байх. Харин одоо МАХН түүнд ашиггүй болж.

Өөрөөр хэлбэл эрх баригч нам үүссэн асуудлыг овжноор ашиглаж нэр дэвших тойрог олдож магадгүй гэсэн санаархал байхыг үгүйсгэх аргагүй. Бидэнд хардах эрх бий. Энэ хүрээндээ л хардан бичиж байгааг ойлгоно биз.

УИХ-ын гишүүн Д.Хаянхярваагийн хувьд МАН-аас Дарханд нэр дэвших шаансгүй болчихсон. Намын дарга, Ерөнхий сайд У.Хүрэлсүхтэй тунчиг ярвигтай маргаан дэгдээчихсэн учраас түүнд тойрог олгохгүй гэдэгт итгэлтэй байна. Харин энэ завшааныг л Ж.Сүхбаатар ашиглахгүй бол өөр хэн ашиглах вэ. Ёстой сонирхолтой шарвалт байгаа биз. Урвалт гэж нэрлэхэд бас хэцүүхэн байгаа юм. Тиймээс л Ж.Сүхбаатарын ашиг харсан нүүдлийг шарвалт л гэж нэрлэчихмээр байна.

Энэ сонгуулиар ч бид их юм үзнэ дээ. Дөнгөж эхэлж байна.