УИХ-ын чуулганы өнөөдрийн нэгдсэн хуралдаанаар Хүний эрхийн үндэсний комиссын тухай хуулийн шинэчилсэн найруулга, Эрүүгийн хуульд өөрчлөлт оруулах тухай хуулийн төсөл болон хамт өргөн мэдүүлсэн Зөрчлийн тухай хуульд нэмэлт оруулах тухай хуулийн төслийг хэлэлцэж байгаа билээ. Чуулганы үдээс өмнөх хуралдаан нэлээд ширүүн явагдсан бөгөөд УИХ-ын гишүүн, ХЗДХ-ийн сайд Ц.Нямдорж, УИХ-ын гишүүн О.Баасанхүү нар бие биерүүгээ хатуухан үг чулуудлаа.
УИХ-ын гишүүн О. Баасанхүү: Бөөс түүж байгаа юм шиг болохгүй байгаа заалт болгоныг бариад яваад байх уу. Энэ Эрүүгийн хууль чинь үнэхээр болохоо байлаа шүү дээ. Эрүүгийн хуулинд 14 настай хүүхдийг бие үнэлж болно гэсэн байдалтай оруулж ирсэн. Насыг нь өндөрсгөнө гэхээр ХЗДХ-ийн сайд том хууль оруулж ирнэ гээд зогсоосон.
Та 2011 онд ХЗДХ-ийн сайд байхдаа Монгол улсыг “Саарал жагсаалт”-д оруулсан. Таныг арай гэж мулталж, зайлуулж амарсны ачаар 2013 онд “саарал жагсаалт”-аас гарсан. Гэтэл одоо 2016 онд та ХЗДХ-ийн сайд болоод, мөнгө угаалттай огт тэмцээгүй, дахиад “Саарал жагсаалт”-д орлоо. “Саарал жагсаалт-д орсон шалтгааныг харахаар 6 нь танай яамны, 1 нь СЗХ-ны ажил байна лээ. Мөнгө угаахтай тэмцэх хуулиа оруулж ирэхгүй юм уу? Эсвэл Ц.Нямдорж та ажлаа өгөөч дээ, залуучууддаа. Монгол Улсад гай болж байхаар. Танайд сайн хуульчид байна.
Хууль зүй дотоод хэргийн сайд Ц.Нямдорж: О. Баасанхүү, би мафитай тэмцэж байгаа нь үнэн. Чи намайг бууж өгөхийг үзэхгүй. Би бууж өгвөл Монголын төр бууж өгсөн, ард түмэн бууж өгсөн хэрэг болно.Чи намайг буулгаж чадахгүй. Би одоо чиний бүрэлдэхүүнд нь ордог мафи, яргачидтай тэмцэж байгаа. Чи Эрүүгийн хууль ерөөсөө ойлгодогүй юм билээ. Бага насны хүүхдийг хүчирхийлбэл ялыг нь хүндрүүлэхээр заасан. Саарал жагсаалт надаас болоогүй. Чи намайг бууж өгөхийг хэзээ ч харахгүй. Би чам шиг байтугай, чамаас бусдад нь бууж өгч үзээгүй юм.
УИХ-ын гишүүн О.Баасанхүү: Айсан хүнд аргал хөдөлж, ичсэн хүн хүн ална гэдэг болж байх шиг байна. Өөрөө мафийн хүн байж. Жинхэнэ гэмт хэрэгтэн бол та өөрөө. 20 жил гэмт хэрэгтэнтэй хамт яваа хүн.
Хууль зүй дотоод хэргийн сайд Ц.Нямдорж: Энэ хууль бол өөрийн чинь санаачилсан хууль. Өөрөө буруугаа мэдээд дахиж өргөн бариагүй. Энэ бол чиний үйлдсэн гэмт хэрэг . МАХН, АН-тай хамтарч үйлдсэн гэмт хэргийн үр дүн ингэж гарч байгаа юм. Та нар бүгдийг самарсан.
УИХ-ын гишүүн О. Баасанхүү: Ц.Нямдорж хууль зүйн сайд болоод 20 жил болоход С.Зоригийн амийг хөнөөсөн хэрэг илэрдэггүй. Олон жил парламентад сууж, гадаадад Монголоо муулаад, хорлоод явдгийг би ойлгохгүй байгаа юм.
2007 онд НҮБ-ын комиссар ирээд эрүүдэн шүүлтийн асуудлаар үүрэг болгосон. Тэр үед нь энэ ажлыг сайнаар хийсэн бол хэн ч эрүүдэн шүүгдэхгүй байсан. 2008 онд Ц.Нямдорж сайд эрүүдэн шүүлтийн яргын сандал оруулж ирсэн. Тэр мөнгийг энэ нөхрөөр одоо төлүүлэх хэрэгтэй.
