БНСУ-аар дамжин өнгөрөгчид дипломат эрх эдлэхгүй хэмээн мэдэгдлээ

Монгол Улсын Үндсэн хуулийн Цэцийн дарга Д.Одбаяр аравдугаар сарын 31-ны өдөр Улаанбаатар-Сөүлийн чиглэлд зорчиж байхдаа тус нислэгийн онгоцны үйлчлэгч бүсгүйд бэлгийн дарамт учруулсан гэх мэдээлэл тархаад байгаа билээ. Тэрээр Индонези улсад зохион байгуулагдаж буй “Олон улсын Цэцийн гишүүдийн хурал”-д оролцохоор 42 настай А гэгч хүнтэй явж байсан нь тодорхой болсон.
Тэднийг зарим эх сурвалжууд нислэгийн үеэр согтууруулах ундаа хэрэглэсэн бөгөөд Д.Одбаяр онгоцны ариун цэврийн өрөөний үүдэнд зөрсөн 20 орчим насны үйлчлэгч бүсгүйн гуянд хүрсэн бол тав орчим минутын дараа А гэгч нь өөр нэгэн үйлчлэгч бүсгүйг мөрөөр нь тэвэрсэн хэмээн мэдээлж байгаа юм.
Үүнтэй холбогдуулан Инчеоны нисэх буудалд газардсан даруй түр саатуулсан бөгөөд БНСУ-д суугаа Монгол Улсын Элчин сайдын яамнаас “Цэцийн дарга болон А нарыг дипломат халдашгүй эрхтэй, хуралдаа оролцоод буцаж ирэхэд нь мэдүүлэг өгүүлнэ” хэмээн тайлбарлан суллуулжээ.
Харин үүний дараа БНСУ-ын Гадаад харилцааны яамнаас эдгээр иргэд нь дипломат эрх эдлэх боломжгүй. Учир нь энэхүү эрх нь зөвхөн тухайн төлөөлөгчийг илгээсэн болон хүлээн авч буй улсад л хамаардаг болохоос дамжин өнгөрсөн улсад хамаарахгүй хэмээн мэдэгдсэн байна.
Тус хэрэгтэй холбогдуулан Инчеоны Бүсийн цагдаагийн газраас өнөөдөр /2019.11.04/ хохирогч гэх хоёр эмэгтэйгээс мэдүүлэг авсан байна. Хохирогч хоёр эмэгтэй “Тухайн үед маш “эвгүй” байдалд орж, ихэд айж сандарсан тул тэднийг шийтгэлээ хүлээгээсэй гэж хүсч байна” гэжээ.
Инчеоны цагдаагийн газраас хэрэв тэднийг Индонезиос БНСУ-д ирж мэдүүлэг өгөхгүй бол хэргийг шууд прокурорт шилжүүлнэ гэж мэдэгдсэн байна.