Д.Одбаяр солонгос бүсгүйн өгзөгөнд хүрсний төлөөсөнд 7 сая вон төллөө

Монгол улсын Үндсэн хуулийн цэцийн дарга Д.Одбаяр албан ажлын шугамаар өнгөрөгч аравдугаар сарын 31-нд Улаанбаатар-Сөүл чиглэлд “Корэйн эйр” компанийн онгоцоор зорчих үедээ үйлчлэгч бүсгүйн өгзөгөнд хүрч, дарамталсан үйлдэл үзүүлсэн. Ингээд тус нислэгийн онгоц Инчеонд газардах үед тус хотын цагдаа нар түүний хууль бус үйлдэлтэй холбогдуулан мэдүүлэг авахаар саатуулжээ.
Харин энэ үеэр Монгол улсын Элчин сайдын яамнаас асуудалтай танилцаж, түүнийг дипломат эрх ямба эдлэх эрхтэй хэмээн мэдэгдэн түр суллуулсан байна. Түүнийг Индонези улсад зохион байгуулагдах Олон улсын цэцийн гишүүдийн хуралд оролцохоор явж байгаа хэмээн тайлбарлаж, хурлаас буцан ирэхдээ мэдүүлэг өгөхөөр тохирчээ. Гэвч Индонези улсыг зорьсны дараа БНСУ-ын хуулийн байгууллагаас тэрээр дипломат эрх ямба эдлэх эрхгүй, сулласан нь буруудсан шийдвэр хэмээн тайлбарласан билээ.
Үндсэн хуулийн цэцийн дарга Д.Одбаяр тус хурлаа дуусгаад энэ сарын 6-нд БНСУ-д буцаж ирэхэд нь цагдаагийн газраас түүнийг саатуулж, 14 цагийн турш байцаалт авсан. Энэхүү байцаалтын үеэр тэрээр эхний мэдүүлгээсээ буцаж, согтууруулах ундаа хэрэглэсэн байсан тул юу болсныг санахгүй байна хэмээн мэдүүлсэн аж.
Өчигдөр Инчеоны прокурорын газрын Гадаад харилцааны асуудал хариуцсан прокурор Ян Кун Су мэдээлэл өгөхдөө Д.Одбаярыг яллах дүгнэлтэд тусгасан үйлдлүүдийн дийлэнхийг хүлээн зөвшөөрсөн хэмээн мэдэгдэж, түүнд долоон сая вонын торгох шийтгэл ногдуулсныг мэдэгдлээ. Мөн түүний хилийн хоригийг өчигдрөөс эхлэн цуцлах шийдвэр гаргасан болохыг мэдэгдсэн юм.
Мөн тус нислэгийн үеэр цэцийн даргатай цуг ижил асуудалд холбогдоод байсан О.Батчулуун гэх залуу Сингапур яваад эргэн ирээгүй учир түүнийг эрэн сурвалжлуулах хүсэлтийг Интерполд хүргүүлжээ.