Шинэ коронавирусийн халдварын нөхцөл байдлын талаар Эрүүл мэндийн яам ээлжит хурлаа хийх үеэр Хил хамгаалах газрын ажилтан, хурандаа Ц.Мягмардорж хилийн асуудлаар мэдээлэл өгсөн юм. Тэрбээр:
Өнөөдрийн хувьд хилийн боомтууд, агаарын замын боомт, Монгол, Хятадын төмөр замын болон авто замын боомтууд хуваарийн дагуу ажиллаж байна.
Агаарын замын боомтын хувьд өнөөдөр Улаанбаатар Хонг Конг чиглэлийн нислэг үйлдэгдсэн. Уг нислэгээр зайлшгүй ажлын шаардлагаар Хонг Конг руу, Хонг Конгоор дамжаад цаашаа гуравдагч улс руу зорчиж байгаа Монгол Улсын 49 иргэн Улсын Онцгой комиссын шийдвэрээр холбогдох зөвшөөрлийг авч, улсын хилээр нэвтэрсэн байгаа.
Хилээр нэвтрэхэд нэгдүгээрт, Улсын Онцгой комиссын зөвшөөрөл хэрэгтэй.
Хоёрдугаарт холбогдох мэдээллээ тодорхойлсон хүсэлтээ гаргаад энэ зөвшөөрлийг олгож байгаа. Хил нэвтрэх үедээ өөрийгөө эрсдлээс урьдчилан сэргийлэх, хорио цээрийн дэглэм сахих тал дээр албан ёсны баталгаа гаргаж явж байгаа. Холбогдох үр дагаврыг биечлэн хариуцна гэсэн баталгаа гаргаад, зохих журмын дагуу Улсын Онцгой комиссоос шийдэгдээд, зөвшөөрөл өгсний дагуу хил нэвтрээд явж байна.
Өнөө өглөө Улаанбаатар-Эрээн чиглэлийн галт тэрэг мөн улсын хилээр нэвтэрсэн. Энэ галт тэргээр Улаанбаатар хотоос 8, Замын-Үүдээс 28 гээд нийт 36 монгол зорчигч тасалбар авсан байсныг холбогдох шийдвэрийн дагуу улсын хилээр нэвтрүүлэлгүй авч үлдсэн.
Транзит гал тэрэг асуудал үүсэж байна. Тухайлбал, Бээжин-Улаанбаатар-Москва, Москва-Улаанбаатар-Бээжин чиглэлийн олон улсын транзит галт тэргээр зорчиж байгаа гадаад игэдийг Монгол Улсад буулгахгүйгээр, дамжин өнгөрч байгаа гадаадын иргэдийг Монгол Улсын хилээр чөлөөтэй нэвтрүүлэх шийдвэр Улсын Онцгой комиссоос гарсан.
Өөрөөр хэлбэл, монгол иргэд гадагшаа зорчихгүй, Бээжингээс чөлөөтэй орж ирнэ. БНХАУ-ын иргэн болон гуравдагч буюу бусад улсын иргэд хэрэв олон улсын галт тэргээр Монгол Улсаар дамжин ОХУ руу зорчих, ОХУ-аас Монгол Улсаар дамжин БНХАУ руу зорчих тохиолдолд шалгалтыг зохих журмын дагуу хорио цээрийн дэглэмийн дагуу зохион байгуулж, улсын хилээр нэвтрүүлэх шийдвэр гаргасан.
Хил нэвтэрсэн иргэдийн судалгааны хувьд:
Нэгдүгээр сарын 31-ний өглөө 08:00-20:00 цагийн байдлаар Монгол Улсын хилээр 1109 монгол зорчигч орж ирсэн. Гадагшаа 450 зорчигч хил нэвтэрсэн.
Засгийн газрын шийдвэрээр Монгол Хятадын хилийн боомтуудаар нэвтэрч байгаа хөдөлгөөнд хязгаарлалт хийсэн үе буюу нэгдүгээр сарын 28-ны 08:00 цагаас 31-ний 20:00 цагийн байдлаар буюу гурав хоногт Монгол Улсын хилээр Хятадын талаас төмөр зам, авто замын боомтоор Хонг Конг – Улаанбаатар, Бээжин – Улаанбаатар нислэгийн чиглэлээр нийт 6370 монгол зорчигч улсын хилээр нэвтрээд байгаа. Мөн сая дурдсан чиглэлээр гадагш 1528 зорчигч тус тус нэвтрээд байна.
Авто замын хилийн боомтуудаар бид холбогдох байгууллагууд, тухайлбал, аймаг, сумдын Онцгой комисс, Авто тээврийн үндэсний төв, Мэргэжлийн хяналт, хилийн хяналтын бусад байгууллагатай хамтраад хилийн чанадад Монгол Улсын өмнөд хилийн авто замын боомтуудын эсрэг талд ирсэн монгол иргэдийг зохих шийдвэр гаргаж оруулж ирж байгаа. Энэ сарын 28-ны 08:00 цагаас өчигдрийн 20:00 цаг хүртэлх хугацаанд хилийн 8 боомтоор 3,036 иргэнийг автобусаар болон микро автобус гаргаж, зарим нь бүр явганаар орж ирсэн гэдгийг хэллээ.
